Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe die dootslach van den hertoge van Orliens worde ghesoent.
Dat X capitel.

Int jaer Ons Heren M CCCC ende IX, als hertoge Willem victorie hadde gehadt van dye van Ludic, ende hertoge Jan van Beyeren, die elect, rustelic besat sijn bisdom, so is hertoghe Willem mit een eerlicke staet van heren ende ridderen gereyst totten coninc van Vrancrijc; ende overmidts hulpe hertoghe Jans van Barri, des conincs voerseit, ende hertoge Jans van Bourgongens oem, hebben si mit groter wijsheit ende cloecheit dat oerloge, dat tusschen den coninc ende den hertoghe lange tijt geduert ende gestaen hadde, ter causen van den dootslach hertoghe Lodewijcs van Orliens, des conincs broeder, vervangen ende opgenomen; ende ordineerden ende maecten enen goeden vasten vrede tusschen den coninc ende den hertoge ende horen landen, van welcke vrede dat gehele conincrijck van Vrancrijck ende andere landen hertoge Willem groten danck ende onsprekelicke lof ende eer hem dairof seyden. Mer God betert! dese vrede en worde niet lange gehouden tusschen dese twee machtighe princen, waerom datter weder grote oerlogen in den landen gevallen sijn. Daer worden dicwils bestanden gheordineert mer niet gehouden, so van dene, so van dander partye, ende aldus sijnder grote oerlogen ende striden geschiet in Vrancrijc, in Bourgongen, Vlaenderen, Artoys ende andere landen, die lange jaren duerden, dat grotelic te beclagen was. In ditselve jaer starf here Aernt van Egmondt ende van Yselstein, ende worde tot Yselsteyn begraven. Ende Jan, sijn outste soen, worde heere van Egmont; ende die hadde te wijf here Jans dochter van Arkel. Ende Willem, sijn joncste soen, worde here van Yselstein; ende dese starf sonder kinder. Ende die heerlicheit quam op here Willem, heere Jans jongste zoen, als voergescreven staet. Ende also daer een ewige viantscap was tusschen hertoge Willem van Beyeren ende here Jan van Arckel, wyens dochter here Jan van Egmont, here Aernts soen, te wive hadde, aldus was daer oec een grote twist tusschen den hertoge ende den here Jan van Egmont ende here Willem van Yselstein, sijn broeder, dat si niet al te wel en stonden in des hertogen hulde. Omtrent dese tijt, so fondeerde here Jan van den Woude, here van Warmont, een cloester van der Cistercien Oerde in sijn heerlicheit van Warmont, op een oude vervallen hofstede, gheheten Oude Teylingen; daer die heren van Teylingen te wonen plaghen, ende stont op dye plaetse daer nu dat bouhuys staet; welke hofstede van Oude Teilingen gecomen was bi versterften an die graeflicheit van Hollant, also die heere van Teylinghen een jonger broeder was van den here van Bredenroeden, ende si beide sonen waren grave Aernouts, die derde grave van Hollandt. Aldus gaf hertoge Aelbrecht ende hertoge Willem, sijn soen, dese hofstede van Oude Teylingen desen here Jan van Woude, ridder, om een cloester dairop te fonderen; dwelcke hi gedaen heeft mit groten costen, ende begaefdet mit betamelike renten. Dese here Jan van Woude starf int jaer M CCCC ende XVII, ende leit int selve cloester begraven voer dat Hoge Outaer. Hi fondeerde ende stichte mede in den selven ambocht een cloester van der Derden Oerden van Sinte Franciscus, voer arme edele joncfrouwen, dair sine huysvrouwe II susteren die eerste of waren, ende waren des heeren dochteren van Cruninghen.