Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat here Jan van Bredenroede ghevangen worde.
Dat V capitel.

Daerna, int jaer M CCCC ende VII, des dages na Sinte Urbanus dach, starf here Willem van Abcoude ende van Wijck te Duersteden, gheen kinder anders afterlatende, dan allene joncfrouwe Johanne, die doe was een besloten nonne ende professijt int cloester te Wijck te Duersteden, huysvrouwe Jans van Bredenroede, professide convaerds totten Carthusers buyten Uutrecht. Ende dese here Willem worde begraven int cloester te Wijck voerseit. Doen quam joncheer Jacob van Gaesbeec, heren Sweers soen van Gaesbeec, des voerseiden here Willems broeder, ende accepteerde ende nam die heerlicheden van Abcoude ende Wijck. Dat siende here Jan van Bredenroede, die convaers voerseyt, doer informatie ende ingeven van eenige quade raetsluyden, is uut dat cloester gegaen, ende als men seyde creech hi dispensacie ende oerlof van den stoele van Romen, dat hi sine huysvrouwe weder uut den cloester soude mogen nemen, ende soude also mit haer accepteren ende anvaerden die heerlicheden van Abcoude ende Wijck. Ende alsoe hem vele resistencye ende wederstant in deser saken ghedaen worde, so is dese here Jan voerseyt int jaer Ons Heren M CCCC ende X, opten IX dach in aprille, mit veel gewapents volcs gecomen in dye stede van Wijck; ende daer viel een grote schermutsinghe, daer vele poorters doot bleven, ende heeft sijn huysvrouwe uut dat cloester ghenomen, ende brocht se in sijn herberge. Dit vernemende here Vrerick van Blanckenhem, biscop van Uutrecht, heeft terstont vergadert alle die soudenyers die hi gecrigen mochte, ende is getogen van der Horst, daer hi doe lach, ende quam mit gewapenderhant binnen die stede van Wijck. Ende hi nam heren Jans huysvrouwe, ende besloet se weder in dat cloester ende heren Jan van Bredenroede nam hi gevangen, ende gaf hem joncheer Jacob van Gaesbeeck, dien gevangen sette opt huys te Wijck. Ende aldus worde dese joncheer Jacob van Gaesbeec vriheer van Abcoude ende van Wijck. Daerna, int jaer M CCCC ende XI, den X dach van januario, starf dese voirseide joncfrou Johanna int cloester te Wijck, heren Jans huysvrouwe, ende leyt aldaer begraven. Ende na haer doot worde here Jan van Bredenroede uuter vangenissen ghelaten, mer hi en ghing eylacy niet weder int cloester: hi worde namaels in die grote strijt te Blangijs gheslagen, anno XIIII C ende XV.