Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van een wilde vrouwe dye in dye zee gevangen worde.
Dat LVII capittel.

Omtrent dese tijt wast een grote ende vervaerlicke storme van winde, van denwelcken vele huysen ter neder wayden, ende den menschen grote scade deden; ende braken oec ten selven tiden vele dijcken in, datter groot

[p. 239v]

last van water in den landen quam. In desen storme ende oploepinge van den zeewater is comen driven ende swemmen een wilt ende ongetammet wijf in die Zuderzee, tusschen Campen ende Edam. Ende aldus swemmende in Purmer Yee, is si gecomen doer een gebroken gat van den dyke in Purmermeer, ende dreef aldus lange tijt op dat water, slapende ende wakende, van dat een eynde totten anderen. Ende si sochte haer aes ende cost in die gront van twater. Si was heel naect van lichaem, sonder clederen an te hebben, mer si was behangen mit enigerley wateringe materie, als mosch, sliver ende ander slijm, al ruych bewassen; ende aldus bleef si daer swemmende lange menigen tijt, om ende wederom, niet wetende waer si hene soude, want si en wist niet weder uut te comen daer si ingecomen was, want die gaten van den dijck weder toegestopt ende gemaect waren van den Purmer Yee, daer si ingecomen was. Die vrouwen ende maechden, die mit scuten van Edam ende anderssins quamen ende voeren over die Purmer Yee melcken die coyen, saghen dicwils dit wijf driven ende swemmen int water, dair si seer of verscricten ende vervaert waren, ende verwonderden sere van dat wijf. Ende als si se dus dicwils sagen, worden sijt gewoen, ende quamen altemet naerder om te sien; dat si ten lesten tsamen spraken, ende vergaerden bieen, ende namen enen moet, ende togen dese vrouwe mit cracht ende gewelt uut dat water in haer scute, ende brochten se binnen Edam opter straten. Niement en konde haer sprake verstaen, noch si en verstont die onse niet. Ende als si scoen ghemaect was ende gereinicht van den slime ende ruychte dair si mede bewassen was, deden si haer cleder an, ende si began onse spise te eten; mer nochtans was si altijt naerstich ende dairop uut, om weder int water te wesen; mer si worde te seer nau bewaert. Dit gerucht overal comende, quam daer veel volcxs om dit wijf te sien, uut vele vreemde landen. Dit vernemende die van Haerlem deden grote instancie ende versoeken an die stede van Edam om dit wijf te hebben om der nyewicheits willen; datwelke si toelieten, ende gaven se hemluyden. Ende daer wesende, leerde si spinnen, ende leefde menich jaer, ende starf ten lesten, ende worde opt kerchof begraven om des willen, dat si dicwils dat Heylighe Cruyce eer ende reverencie dede. Ende dit is geapprobeert ende ghecertificeert van enighe oude notabele ende warachtige mannen, die seggen dat si dese vrouwe binnen Haerlem in haer tijt hebben gesien. Waerom datter in dese cronike voer een nyewicheit is gheset.