Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe hertoghe Aelbrecht dye stede van Gorichom beleyde.
Dat LVI capitel.

Als hertoge Willem van Beyeren, grave van Oestervant, dicwils int lant van Arkel gesonden hadde sine mannen van wapenen ende oerloge, ende hadden dat mit allen seer ghedestrueert ende verbrandet, ten lesten heeft hertoge Aelbrecht, des graven voerseyden vader, opghenomen dye stede van Gorichom mit heercracht te belegghen, om den here van Arkel daeruut te verdriven ende te doen trecken in vreemden landen. Waeromme int jaer M CCCC ende III heeft hertoghe Aelbrecht alle sine macht doen vergaderen uut Henegouwen, Hollandt, Zelant ende Vrieslant, vele gewapents volcs ende soudenyers uut Enghelant ende andere nacien, dattet ontellick was, ende in groter menichte. Die hertoge Adolf van Cleve ende van der Marck ontseyde den here van Arkel mede doer hertoge Aelbrechts wille. Ende dyerghelijken dede oec mede dye bisscop van Uutrecht ende die stat van Uutrecht, die den here van Arkel mede ontseyden. Die here van Arkel siende dattet al tegen hem opstont in stride, creech in sijnre hulpen den grave van Vernenburch; Jan, grave van Dalem, here van Steinvoorden; die joncheer van Reida; die joncheer van Hoemoet; grave Henricx broeder van Catsennelleboge; here Vreric van Bergen ende van Ycele, ridder; den here van Criekenbeeck; here Lucas van Boetselaer, ridder; den here van Ranst mit sijn broeders; here Willem van Ysendoern, ridder; here Aernt van Zeelen, ridder, mit sine broeders; here Aernt van Scoennouwen, ridder; here Dirck van Lienden, ridder; here Henric van Vayric, ridder; here Henric van Nyenstein, ridder, een bastaert van Arkel; den here van Zoelen ende Avesaet; here Adam Millinck, ridder; Otte van Vueren, mit meer ridderscaps des lants van Gulick ende van Ghelre. Hertoghe Aelbrecht, die niet of en liet van sijn opset, is mit alle sine edelen, ridderen ende schiltknechten, mit een groot machtich heer van volc gecomen, mit blinckende bannieren ende mit trompetten, ghecomen int lant van Arkel; ende heeft mit groter heercracht sere scarpelicken belegen die stede van Gorichom, op Sinte Pieters ende Pouwels dach, die here van Arkel daerbinnen wesende met al den edelen ende ridderen voer ghenoemt. Die hertoghe hadde dye stede ende dat slot al omme beleyt, mit een belegghe in deser manieren. In den eersten hadde dye hertoghe⁴⁸⁴, mit den grave sinen sone, haer heer geordineert opten dijck tusschen dat dorp van Arckel ende die steden van Gorichom, an die noortside van der stede. Hertoghe Adolf van Cleve, mit joncheer Walraven van Bredenroede, mit vele steden van Hollant ende mit vele Engelschen, hadden haer tenten opgheslaghen an die oestside van die stede ende dat slot. Dye van Uutrecht mit haer burgheren ende ghewapenden, hadden haer nederghestelt an dye noortsyde van dat

484 hertogge AB.

[p. 239r]

slot, in een plaetse gheheten den Twijschilt. Die Henewiers mitten Zuyt-Hollanders hadden haer plaetsen genomen an die zuytsyde van die stede ende dat slot. Die Zeelanders mitten Vriesen, mit meer andere gewapende vrome mannen, hadden begrepen die westside in vele diverse plaetsen. Dat heer aldus geordineert wesende, elc op sijn plaetse, doen worden toegestelt die grote bussen ende andere instrumenten tegen dat slot, datwelcke dagelixs so seer worde angescoten mit grote ende cleine bussen ende andere instrumenten, dat mitsdien die grote toern geheel ende al worde gedestrueert ende ghebroken. Die poorters worden oec opter straten gaende mit pilen ende knipbussen seer gequetst, ende vele husen worden van den groten bussen ter neder gescoten. Die poorters mitten edelen daerbinnen wesende, weerden hem vromelicken, ende waren seere naerstich die vianden mit schieten ende werpen van hare mueren, poorten ende bolwercken te verdriven. Op eenre tijt ist geboert, dat die joncheer van Reyda, dye joncheer van Hoemoet, mit meer andere edelen ende soudenyers, die poorten van der stede heimeliken deden opdoen, ende quamen onversiens ende schielicken in die leger, daer die Zelanders mitten Vriesen lagen, ende begonden mit groter moedicheit op hem te slaen om dye overhant te houden. Mer die Zeelanders cregent te quaet. Daer worde die joncheer van Reyde ridder geslagen. In deser scermutsinge worden gevangen van den Zeelanders Floris van Borselen; Floris van Abeel; Claes Kervinc van Reimerswael, heer van Lodijck, ridderen; Boudewijn ende Floris van Borselen, gebroeders; Willem van Reints; Phillips van Everingen; Jan, die bastaert van Borselen, met noch X C gewapenden. Mer heer Willem van Reimerswael, ridder, die starf corts daerna van sine quetsinge, ende worde binnen Gorichom begraven. Op een ander tijt daerna sijn weder enige edele ende soudenyers heymelic uut Gorichom gecomen in die leger des hertoge van Cleefs; ende daer geviel weder een sware scermutsinge ende slach, dattet vele doden an beyden syden bleven. Ende daer worden gevangen ende binnen Gorichom ghebrocht joncheer Walraven van Bredenroede; here Gielis Scenck; ridder Steven van Berenbroeck; Jacob Scicker; Pieter Potter; Huge Post, mit meer andere edelen ende soudeniers. Dit aldus gheschiet wesende, weynich tijts daerna, quamen uuter stede Willem van Ysendoern, Aernt van Schoennauwen, ridders; Jan Hoper, Thomas Westerdale; Jan Crocxtonghe, David Carmerdijn ende Thomas Herfoert, mit meer andere edelen ende poorters van der stede, ende quamen op die plaetse, daer die Henewiers lagen. Dair geviel een harde ende scarpe scermutsinge, mer si worden vromelicken wederstaen, ende confuselicken weder in dye stede gejaecht, ende sloegen se van afteren tot an die poorten van der stede; ende dit was op Sint Jans Onthoefdingen dach. Durende dit belegge sende die grave van Oestervant een deel vrome gewapende mannen in dye heerlicheyt van Scoenrevoert, ende dede dat destrueren ende verwoesten tot lachter ende scande des heren van Arkel, dat welke si altemalen verbranden, ende vingen vele van den luyden die dair woenden. Als dit belegge geduert hadde omtrent XII weken, quam daer hertoge Jan van Beyeren, elect tot Ludick, hertoghe Aelbrechts soen, met heer Aernt van Leyenborch, met heer Hacke van Out-Hoesden, ridders, mit meer andere edelen, ridderen ende schiltknapen, ende maecte daer enen pays in deser manieren: als dat die hertoge Aelbrecht mit zijn sone, die grave van Oestervant, souden comen binnen der stede; ende die here van Arckel soude enen voetval doen, ende bidden den heren om genade. Ende dat men des hertogen bannyer uut dat slot soude steken enen helen dach lang, tot een teyken der victorien. Dat ghedaen sijnde, quamen die binnen der stede, ende dat heer brack op ende vertoech.