Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van dat oerloghe der Hollanderen ende der Arkelschen.
Dat LV capitel.

Int jaer Ons Heren M CCCC ende II versaemde here Jan van Arckel een deel ghewapents volcx, ende passeerde over die Lecke, ende quam in Crimperwaert, rovende ende brandende, ende nam mit hem enen groten swaren roef van beesten ende andere goeden, ende woude daermede binnen Gorichom trecken. Die van Dordrecht ende van Scoenhoven dit vernemende, sijn mit alle haer dorpen uutgetogen, ende quamen in die Nyepoert, ende vergaerden daer te samen, ende wouden den Arkelschen den rove mit macht benemen oft eenen strijt met hem vechten; ende quamen met blinckenden bannieren, mit trompetten, den Arkelschen te ghemoet. Als si nu by malcanderen quamen, geviel dair een scarpe scermutsinge ende harde strijt. Dair bleven in den anganc doot XXIII dorpluden. Ende dair worden gevangen here Gherrit van Liesvelt, ridder; Wouter Simons soen; Adriaen Wittens soen; Gerrit Mobbout; Huge Beeldesnier, poorteren van Dordrecht; Burchaert ende Jan Robbrechts zoen, poerteren van Scoenhoven; ende VII lantluyden van Leckerkerck ende V van Screvelant. Opten VII dach daerna, togen die van Rotterdamme ende Schiedamme uut, met vele gewapenden, ende quamen int lant van Arkel, ende verspreyden hem overal, gelijcken sprinchanen, verbarnende, verwoestende ende vernyelende alle datghene datter was bliven staen, ende sijn mit groten loven ende zege wederghekeert in Hollant, mit hem hebbende vele beesten ende andere rijcdommen die si daer hadden gheroeft. In datselve jaer dede die grave van Oestervant vergaderen die van Haerlem mitten Kermers, dye van Leyden mitten Rijnlanders, dye van Amstelredam mitten Waterlanders ende Goylanders,

[p. 238v]

ende heeft se gesonnen mitten vromen ridder here Henrick van Wassenaer, burchgrave van Leyden, int lant van Arkel, dat si mit heercracht die opgheblasen hoevaerdicheyt heren Jans van Arkel castien ende temmen souden, ende dat si verwoesten ende verdestrueren souden alle datghene also wel menschen als beesten dat in der heerlicheit ende onder die dominacie van den here van Arkel geseten ware. Ende aldus devasterende ende destruerende alle datghene dat si buyten steden oft sloten staende vonden, sijn si mit ontwonden bannieren ende mit groter heercracht gecomen voer die stede van Hagenstein. Si anstormden ende bevochten die poorters mit menigerlei assaulte, mit schieten ende werpen van pylen, loon, cloten ende andere instrumenten, ende si verbranden die voerstede mit een molen ende keerden weder mit diverse goeden van beesten ende anders, ende quamen doert lant van Vianen weder in Hollant ongescadicht. Die here van Arkel siende dat alle sine heerlicheit ende landt van Arkel so deerlicken was gedestrueert ende vernyelt, begreep hi wraeck daer over te doen; ende is ghecomen mit een deel gewapender mannen voer Nyepoert, dat hi mit vechtenderhant gewonnen heeft ende verbrandet tot in den gronde.