Van dat oerloge tusschen hertoge Aelbrecht ende den here van Arkel.
Dat LIIII capitel.
Int jaer Ons Heren M CCCC ende een, doe begeerde ende versochte hertoghe Aelbrecht van Beyeren rekeninge te hebben van here Jan van Arkel, die X jaer lang rentemeester ende tresoryer hadde geweest der landen van Hollant. Here Jan, die een groot hoemoedich man was, en woude gheen rekeninge doen. Waerom dat hertoge Aelbrecht committeerde ende beval dye sake den grave van Oestervant, sinen sone. Diewelcke terstont alle die goeden ende heerlicheden des heren van Arkels in Hollant gelegen, als Haestrecht, Vlist, Stolcwijc, mit meer ander dorpen, dede confisceren ende toeslaen, ende bande den voerseiden here Jan van Arkel uuten lande van Hollant. Dit tornde seer den here van Arkel, ende dede terstont ontseggen mit open brieven den hertoge Aelbrecht van Beyeren. Ende dese ontsegbrieven ontfing hertoge Aelbrecht, wesende op die tijt opt huys te Nyeburch bi Alcmaer. Ende terstont daerna quam die here van Arkel onversiens vallen voer die stede van Oudewater, mit een deel gewapents volcs; mer hi en bedreef niet, wanttet terstont van den poorters vernomen worde wat sijn opset was. Ende verstoert wesende, toech hi voert huys te Ghijsenburch, ende wan dat ende beroefdet. Daerna toech hi voir Werckendam, dair hi tvier inschoot, ende verbrandet, ende reysde so voert ende quam tot Alblasserdam, daer hi een deel armer luyden huysen ofbrande. Dit ghedaen sijnde, sende hi mede sijn ontsegbrieven hertoge Willem van Beyeren, grave van Oestervant, hertoge Aelbrechts soen. Ende die bode presenteerde dese ontsegbrieven den voerseyde grave van Oestervant in presencie ende teghenwoerdicheyt hertoghe Phillips Lehardi, hertoge van Bourgongen, op dye tijt wesende opt slot te Kenout in Henegouwen. Dye grave van Oestervant ontfing desen bode vriendelicken, ende dede hem des middaghes goede chyere, hem tonende een blide aensicht, ende begaefden mit milde gaven, ende senden wederom tot sinen here, ende seyde: 'Gaet ende segt uwen here: "Siet, het is in uwer macht geweest ons te ontseggen. Ende het sal oec in onser macht wesen, oft wi u weder in genaden sullen willen ontfangen oft niet."' Ende corts hierna quam die grave van Oestervant uut Henegouwen bi hertoge Aelbrecht sinen vader.
Auteursrechtelijk beschermd