Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat biscop Vreric van Blanckenhem die van Groeningen brochte onder sine subjectie ende onderdanicheit.
Dat LIII capitel.

Also here Vrerick van Blanckenhem, biscop van Uutrecht, uut sekere oude brieven verstaen hadde, hoe dat die stede van Groeningen van rechtswegen toebehoerde sinen Stichte ende Sinte Martijns kercke, so docht hi ende nam op, hoe dat hi die stede weder soude moghen brenghen onder sijne subjectie ende onderdanicheit. Waeromme dat hi gesonnen heeft notabele ambassaden ende boden, requirerende ende ondersoekende oft si hem souden willen submitteren ende onderdanich wesen, hi wilde hen een goet ghenadich here wesen. Daer worde een dachvaert ghehouden, mer daer en worde niet ghesloten dwelcke wesen mochte tot voerdeel ende profijt van den biscop. Die biscop dit anmerckende, dede van sine luyden van oerloge begripen een starcke fortresse ende plaetse, omtrent een myle weges van Groeningen, ende dede dat ombegraven ende vast maken mit bolwercken ende toornen, dat hi daeruut die stede van Groeninghen benemen soude haer uutganc ende inganc totten landen van Hollant ende Ghelre. Mer als hi sach dat hi daer nyet veel mede en profiteerde, ende dattet henluyden nyet en hinderde, heeft hij doen vergaderen uut alle sijn Sticht ende andere landen vele vrome wapentuers ende soudenyers, ende heeft die stede van Groeningen beleyt mit groter macht ende heercracht. Ende dit was int jaer M CCCC ende een, omtrent Sint Jacobsdach. Die biscop dede die stede anstormen tot vele steden mit grote bussen ende andere instrumenten van oerloghe, ende quetste se mit allen sere an muren ende toornen, alsoe dat die van binnen sere daerof benaut waren. Die burgeren van binnen stelden hem vromelicken ende stoutelicken daertegen, bescermende haer muren ende poorten van den assaulte ende anvechtinghe van die⁴⁸² van buyten. Daer bleef menich vroem man binnen ende buten der stede van den schieten ende werpen der stenen ende der pylen. Die Vriesen vernemende die benautheit der stede van Groeningen, waren seer sorchvoudich die alle dage sere starck te maken ende mit vitaelge ende soudenyers te versien. Dye biscop, nadat hi daer III weken voir hadde ghelegen, ende anmercte dat hi die stede, die onwinlic was, also niet crigen en mochte, overmidts dat die Vriesen alle daghe daeruut ende inquamen, ende spijsden se ende voirsaghen se mittet gheen dat hem van node was, is hi ten lesten van den belegge opghebroken. Nyettemin, hij benaude nochtans die poorteren van Groeningen so seer, dat si nergens varen noch keren en mochten, dat si hem ten lesten gaven onder subjectye ende onderdanicheyt. Ende⁴⁸³ sy hulden hem voer eenen heer, ende deden hem eenen eedt; ende aldus worde hij heere van Groeningen. In ditselve jaer worden vianden die van Hamburch teghen den Hollanders; ende si en mochten tot genen compositye van payse comen, dan by grote sommen van penninghen.

482 van die van die AB.

483 En AB.