Hoe die Oest-Vriesen rebelleerden ende si bedwonghen worden.
Dat L capitel.
Die Oest-Vriesen hebben weder gebroken den vrede ende bestant datter gemaect was tusschen hertoge Aelbrecht ende den Vriesen, ende setten hem weder in rebelheit, verdrivende uut Staveren ende andere plecken alle dye Hollanders; ende dit was int jaer M III C ende XCVIII. Waerom dat die hertoge dede weder vergaderen een groot machtich volc van wapenen, ende is daermede getogen tot Hoern ende Enchusen, ende woude vandaen overvaren in Oest-Vrieslant; ende hy was in meninge daer te bliven. Mer hi sant den grave van Oestervant, sinen soen, mit al dit volc in Vrieslant, ende sette onder hem te wesen cappeteinen heer Jan van Arkel; heer Jan van Bredenroe; heer Aernt van Egmont ende Yselsteyn, mit meer andere baroenen, ridderen ende edelen sijnre landen. Die grave van Oestervant comende in Vrieslant bi Lemmers, toech doer Geesterlant ende comende bi Hindelopen, quam hem te moete een groot heer van Vriesen om tegen hem te striden. Die grave liet sijn bannieren ontwinden, ende dede sine trompetten opsteken, ende ging den Vriesen vromelic te ghemoete. Die Hollanders ancomende ende starckelic op die Vriesen dringende, worden daer in den eersten angange driehondert Vriesen verslegen; ende dye ander keerden terstont den rugge, ende liepen wech. Doe staken die Hollanders die naeste dorpen ende lanthusen an brande, ende verwoesten mit allen seer dat lant. Ende si slogen haer tenten ende pauweljonen voer die stede van Staveren, ende beleiden die al om mit al haer macht, dat daer nyemant in noch uut en mochte, te lande noch te water. Ende als si dus strengelic waren belegen ende dagelixs mit groten assaulte ende stormen vreselic anbevochten worden, ghaven si hem ten lesten in des graven genaden, ende si ghaven hem in ostage ende stelden te onderpande die machtichste ende rijcste van der stede. Dit aldus gesciet wesende, zijn alle die Vriesen van den steden ende dorpen, overmits vrese sijns naems, seer vervaert gheworden, ende quamen tot Staveren biddende genade, ende beloefden den grave beteringe te doen van haerre rebelheit. Dye grave beriet hem met sine baroenen ende edelen, ende daer worde een vrede ende pays geordineert tusschen beiden partien in deser formen ende manieren: als dat die Vriesen souden hertoge Aelbrecht ontfangen voer haeren rechten warachtigen heer of hertoge; Willem, sinen zoen, in den naem van hem; ende dat elck huys ende hoefstede soude gehouden wesen te betalen ten ewigen dagen hertoge Aelbrecht ende sine naecomelingen, graven van Hollant, Zeelant ende heren van Vrieslant die zomme van VI stuvers tsjaers tot enen tribuyt ende kennisse dat dye grave van Hollant haer erfheer waer. Ende dit worde aldus besworen ende mit brieven vast gemaect. Ende als dit aldus was gesciet, soe sette hi den Vriesen baeljuwen, scouten ende regeerders, die uut sinen name dat lant souden regeren, recht ende justicye doen. Ende dye grave quam weder over mit groter eren ende triumphen, ende worde blidelic van sinen vader ontfangen. Int selver jaer starf sonder kinder after te laten Gwije, grave van Boloys, heer van der Goude ende van Schoenhoven, die leste heer ende grave descenderende ende dalende van der rechter linien ende grade heer Jans Beadmont. Na wiens oflivicheit de heerlicheden van der Goude ende Scoenhoven weder ghecoemen sijn an dye graeflicheit van Hollant. Ende hi liet enen bastaert soen after, geheten heer Jan van Boloys, ridder, ende was heere van Treslongen
Auteursrechtelijk beschermd