Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat slot te Loevenstein gewonnen wort, ende hoe dye grave van Cleve enige gevangen creech, daer hi groot goet of scatte.
Dat XLIX capitel.

Int jaer M III C ende XCVII hadde hertoghe Aelbrecht een trisorier ende rentemeester van Hollant, geheten heer Bruytstone van Heerwijnde, ridder, van denwelken hi begeerde te hebben rekeninge van den ontfangen ende uutgeven; tot welken heer Bruijtstone hemselven niet wel bereyt en hadde. Waerom die hertoge hem dede besetten in dye stede van Aemstelredam, ende daer bliven ter tijt toe dat hy sine rekeninge hadde ghedaen. Mer hi en bleef daer niet lange; want doen hij sijn open sach ende den tijt, reysde hi scielijken vandaen, ende toech op dat huys te Loevensteyn bi Gorichom, want hy dat slot enige jaren doer des hertogen beveel onder sine subjectye hadde gehadt. Ende hi dede dat slot versien van vele provanden ende ander gereetscap, tot die bescermenisse des huys, daerop settende ontrent X C vrome mannen, mit IIII cappeteinen; ende hi toech in den lande van Gelre. Dit verhorende hertoge Aelbrecht, dede vergaderen een groot volc van wapenen, ende sende hertoge Willem, sinen soen, den grave van Oestervant, mit al dat volc voer dat slot te Lovenstein. Ende die grave van Oestervant quam daervoer des donredages na Midvasten, ende beleydet tot allen siden. Alle ding bereyt wesende om te stormen, heeft hi dat slot so vreseliken angestormt mit grote sware stenen van den bossen dairop te werpen, dat hi dat voirgeburcht met allen seer dairmede quetste ende brac, ende dat ten lesten dye grote torn des voerburchs nederviel, met hem ter neder treckende een groot stuc van der muren, dat men lichteliken sien mochte wat men int voerburch dede ende geschiede. Ten lesten scoten dye van Dordrecht enen groten swaren steen uut eenre bussen, ende viel in dat voerburch op een huys staende mit hoy. In welken huys bi den viere saten Otte van Driel mit noch IIII ander gewonde knechten. Ende dat huys viel neder op dese knechten, ende verbranden mit huys ende mit hoy, ende al datter in was. Ende terwylen dat⁴⁷⁷ dese brant geduerde, soe liepen die Hollanders an ende wonnen dat voerburch. Ende als diegene dat sagen dye int voerburch waren, dat si soe overvallen worden, lyepen si mit haesten op dat slot om dat te bescermen. Mer die Hollanders scoten soe vervaerlicken ende stadelicken met clovers ende⁴⁷⁸ mit armborsten opt slot, dat si nauweliken een veinster opdoen en mochten. Ende als dit stormen enen dach ende nacht hadde gheduert, presenteerden si hem op te gheven in ghenaden van den hertoghe. Ende si gaven hem gevangen in des graven handen van Oestervant opten heilighe Ghoeden Vridach tsnachts. Die grave van Oestervant beval zijn

477 dat dat AB.

478 endede AB.

[p. 236r]

getrouden vrienden dat huys, ende hi reisde mitten gevangen tot sinen vader mit groten prise ende triumphe, ende worde blydelic ontfangen opten Heiligen Paeschavont, onder welcken dat waren drie sonen van den voerseyden heren Bruystone, ridder. In datselve jaer, op Sinte Petronellen dach, hadde dye grave Adolf enen strijt, daer hy in ving onversiens Willem, den eersten hertoge van den Berghe, ende Reinout, hertoge Willems broeder van Gulic ende van Gelre, mit vele edelen princen ende heren, denwelken hi groot ghelt ende goet ofscatte⁴⁷⁹, want van hertoge Willem creech hi Keyserswaert met sinen toebehoren, ende van des hertogen broeder creech hy Emmerijck mit sinen toebehoeren.

479 oftscatte AB.