Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den scoffieringe die den grave van Oestervant worde gedaen an des conincs tafel van Vrancrijc, ende hoe hy mit sinen vader worde verenicht.
Dat XLV⁴⁶⁴ capitel.

Opten heiligen XIII dach, int jaer M III C ende XCV, ist geboert, dat die doirluchtige hertoge Willem van Beyeren, grave van Oestervant, sittende an des conincks tafel van Vrancrijc mit andere princen heren ende edelen, gecomen is des conincs herault, ende sneet des hertogen Willems tafelaken, voer hem leggende, an stucken, seggende het en⁴⁶⁵ betaemt niet, dat enich prince of here sitten sal an des conincs tafel, die scilde noch wapen heeft. Ende als hertoghe Willem seyde, dat hi scilt ende wapen hadde, seyde een out heraut daerop: 'Mijn here, ghi en hebt niet, want wilen grave Willem van Hollant, u outoom, niet alleen verslagen is van den Vriesen, mer leyt noch begraven ongewroken in sijnre vianden lant, als in Vrieslant.' Ende van dien dach voert began hertoge Willem te denken hoe ende in wat manieren hy alsulken confuys ende schande van hem mochte doen ende verdriven. Hertoghe Willem toech mit groter confuse⁴⁶⁶ ende scaemte uut Vrancrijc, ende quam in Henegouwen; ende omdat hi noch vreesde te comen in sijns vaders presentie, heeft hi heimelike brieven gescreven ende gesonden aen sinen vader, beteikenende ende bewisende die grote scaemte ende blammatie die hem in Vrancrijck an des conincs tafel ware gedaen ende ghesciet, versoekende ende biddende sinen vader oetmoedeliken dat hi alsulken scande ende laster van hem ende sine geslachte wilde laten wechdoen. Als hertoge Aelbrecht dit verhoerde, sprac hi: 'Dese blammatie ende onere en sal mijn kinderen voertaen nyet meer verweten worden, want ic wil selver trecken in Vrieslant ende wil recupereren ende wederhalen mijnen oem, grave Willem, met sinen wapen, ende ick wil wrake doen over sinen doot ende mi God spaert dit naestcomende jaer.' Ende corts dairna, doer minlicke tusschenspreken, is dair een vriendelyc pays ende vrede gemaect tuschen den vader ende tkint. Ende hertoghe Aelbrecht heeft sinen soen mit alle die gebannen heren in genaden genomen, ende quam in Den Hage, ende worde met groter eren ende feeste van sinen vader ontfangen.

464 XL AB.

465 aldus C; een AB.

466 confnse AB.