Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe Outhena belegen worde ende sommige castelen gedestrueert.
Dat XLIII capitel.

Hertoge Aelbrechts, dye in meninge was sinen soen mitten anderen gebannen

[p. 233r]

⁴⁶⁰ edelen uut sine landen ende heerlicheden te verdriven, dede van stonden an vergaderen uut Hollant, Zeelant ende Vrieslant een groot machtich volc van edelen ende andere gemeen luden der steden ende dorpen, ende sende Conraet Kuser met desen hoepe om te destrueren ende verwoesten die castelen ende sloten der gebannen heren. Conraet Kusert macht hebbende, is met al dit volc ghetogen, ende destrueerde in den eersten dat huys te Hodenpijl, Duvenvoerde, Santhorst, Heemstede, Warmont ende Paddenpoel, den burchgrave van Leyden toebehoerende buten Leyden, dat men nu hyet dat cloester te Nonnenpoel. Hertoghe Aelbrecht is die Merwen opgetogen mit heercracht van volc, ende quaem des dages nae Sinte Peter ende Pouwelsdach tot Gorichom int jaer M III C XCIII, daer hi van here Ot van Arkel vriendelic ende eerlic worde ontfangen. Des anderen dages is hi getogen na Woudrichom, ende vandaen tot Outena, datwelcke hy alom mit zijn volc crachteliken beleide. Hertoghe Willem, grave van Oestervant, hadde dat slot bevolen eer dat sijn vader daer voren quam sinen getrouwe vrienden, om dat te bescermen, ende hadde daerop gelaten alle instrumenten ende gereetscappen van oerloghe ende alle des hem van node soude mogen wesen, ende was ghetogen binnen tsHertogen Bossce. Die borchsaten, die opten huse waren, setten hem vromelic ter were tegen den hertoghe, ende dye hertoge hadde dat slot an allen sijden mit bussen ende andere grote instrumenten die muren ende toernen mit daghelixen assaulten ende stormen sere mede doen quetsen ende vernijelen. Ende als dit aldus gesciede in Zuyt-Hollant, quam hertoge Jan van Beyeren, elect van Ludic, des hertogen Aelbrechts soen, mit sinen raet ende mitten raet des lants van Henegouwen, ende maecten een compositie ende dadinge tuschen sinen vader ende sinen broeder, mitten heren die belegen waren, alsdat diegene die opten huse waren souden hem opgheven behouden lijf ende goet, ende souden dat slot leveren in des hertoghen handen. Ende dat ghedaen wesende, worden die heren geleyt ende gebrocht mit sekerheit tot sHertoghen Bossche bi den grave van Oestervant, die se daer verbeide. Ende dit was op Sinte Margritendach. Dye hertoge dit slot in hebbende⁴⁶¹, dede dat destrueren, uutgeseyt die twe grote toornen; ende hertoge Willem, grave van Oestervant, gaf die toornicheit een stede, ende is getogen in Vrancrijck, bi coninck Kaerle, de seste van dier naem.

Des tsjaers daeraen, M III C ende XCIIII, doen dede heer Aernt van Egmont ende IJselstein in timmeren ende fonderen dat cloester buten Yselsteyn, van der Barnerditen Oerde, ende begaefde dat mit scone renten.

460 aldus A. CC XLIII B.

461 hebbene AB.