Van den twist tusschen hertoghe Aelbrecht ende grave Willem van Oestervant sinen soen.
Dat XLII capitel.
Ter wilen dat dese dingen van der electyen van enen biscop te kiesen tot Uutrecht gheschieden, so is onversienlic in den lande van Hollant opgestaen een grote twedracht ende twist; want Coenraet Kuser die vervolchde seer starckelic mit sine vrienden an hertoge Aelbrecht omme recht ende justicie te geschien tegen denghenen die sinen soen Willem Kuser dootgeslagen hadden, allegerende ende seggende dat hi bedriechlic ende sonder actye ofte sculde bi nachte wesende in den dienst sijns heren ende op des heren hof ende plaetse, mit joncfrou Alijt van Poelgheest vermoert ende geslagen ware. In denwelken moort ende dootslach hij accuseerde ende besculdichde als hantdadige ende raetgevers Phillips burchgrave van Leyden; Dirc, heer van Asperen, mit sijn soen; II jonger broeders van der Leck; Henric, burchgrave van Montfoert; Jan, here van Heemstede; Jan van Vliet; Phillips van Polanen, ende den here van Duvenvoerde; heren Jan van Woude, here van Warmondt, mit meer machtige ende edele heren, tot LIIII toe. Waeromme dat hertoge Aelbrecht te recht ghinc sitten in zijn palays, ende gaf een sentencie bi assistencie ende vonnisse sijnre mannen van rade, also dese voerghenoemde personen ghecyteert ende ghedaecht waren ende niet en compareerden, noch te recht en quamen, dat si des feyts sculdich souden wesen, ende dat si daeran verboert hadden lijf ende goet; ende dede se altesamen bannen uuten lande van Hollant. Hertoghe Willem, grave van Oestervant, outste soen des hertogen Aelbrechts voerseit, die seer lief hadde dese voernoemde edele mannen, solliciteerde ende versochte an sinen vader dat hi dese edele mannen des feyts ende moerts ontsculdich woude houden. Mer die hertoge en wouts nyet horen, in geenre manieren; waerom dye grave van Oestervant toernich worde, ende sceyde mit enen erren moede van sinen vader; ende als hi vernam dat sijn vader hem mede lagen dede leggen, so reysde hi uuter Hage ende toech mitten voirnoemden edelen opt huys te Outhena in Zuyt-Hollant. Welck casteel hertoghe Aelbrecht wilen eer vercregen hadde van den here van Hoern, ende hadt ghegheven sinen outsten soen Willem, den grave van Oestervant. Dieghene die nu by den hertoge gebleven waren, saeyden alle haet ende nijt, ende deden alle quaet dat si mochten tusschen den vader ende dat kint, daer die princepaelste of was Joncheer Jan van Arkel, heren Ots soen, stedehouder ende tresorier van Hollant.
Auteursrechtelijk beschermd