Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van hertoghe Jan van Beyeren, elect tot Ludick.
Dat XXXV capitel.

Int jaer Ons Heren M CCC ende LXXXIX, opten VIII dach van maert, omtrent den middernacht, starf heer Aernt van Hoern, bisscop tot Ludick, in sijn palays tot Ludic, ende sijn lichaem wort gevoert te Hoern, ende wert begraven in sijn ouders graf. Ende doen coren die heren van den capitel Dirc van der Marck. Ende als hi dese electie niet ontfanghen en wilde, doen worde bi consent ende wille des paeus Urbanus die VI, hertoge Jan van Beyeren ghenomen van der kercken van Camericken, ende wort gecoren tot enen biscop van Ludick, out wesende omtrent XVI jaer. Sijn vader was hertoghe Aelbrecht in Beyeren, grave van Henegouwen, Hollandt, Zeelant ende Vrieslant. Ende int jaer Ons Heren M CCC XC, den X dach van der maent julio, doen quam binnen Ludick riden die elect, here Jan van Beyeren, mit sijn vader hertoge Aelbrecht voerscreven, ende mit sinen broeder hertoge Willem, grave van Oestervant, mit meer ander princen ende edelen, mit M paerden. Ende hi worde sere eerlicken van dat capitel ende burgeren van Ludic ontfangen, als dat ghewoenlick is.