Hoe joncfrou Alijt van Poelgheest dootghesleghen worde.
Dat XXXVI capitel.
DaernaGa naar voetnoot453, in den jare M CCC ende XCII, op Sinte Mauricius nacht, doen worde in Den Hage dootgeslagen joncfrou Alijt van Poelgeest, hertoge Aelbrechts boel; ende was Jan van Poelgeest dochter, schiltknape. Ende doen Willem Kuser, des hertoghen hofmeester, haer bescermen woude, worde hij op haer lijf dootgeslegen van denselfden dye dese moort deden. Ende die die feyt deden ruymden terstont dat lant, ende liepen wech. Ende van desen dootslach quam noch na een grote oploep ende rumoer in den lande, als men na horen sal. In dit selve jaer worde den eersten steen gheleyt van den Carthuser cloester buyten Uutrecht, an die noortsyde van der stat. Ende dit, doer toedoen heren Sweer, heer van Gaesbeeck, Putten ende Strenen, dat welke cloester hi fondeerde, doteerde ende begaefde mit behoerlicke goede renten, bi raet heren Tyelman Graeuwert, deerste prior desselven convents.
Auteursrechtelijk beschermd