Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den oerloghe tusschen die Arkelse ende die van Vianen.
Dat XXXIIII capitel.

In den jare daerna, M CCC ende LXXXVIII, stont een quaet fel oerloghe op tusschen joncheer Jan van Arkel, heren Ots soen van Arkel an dene side, ende here Henricxs van Vianen, erfgenaem des heerlicheits van der Ameyden an dander side. Dese II partyen deden malcanderen grote sware molestacie ende verdriets, mit roven, branden, vangen, ende malcander doot te slaen, elcx dene des anders ondersaten, sonder ghenade. Here Otte van Arkel hadde vergadert vele cloeke vrome mannen ende soudenyers, daer hij dat casteel ter Ameyde starckelic mede beleide, ende verbrande dat dorp ter Ameyde te pulver. Die burchsaten weerden ende onthilden hem vromelic een lange tijt. Doen quam ten lesten hertoge Willem, grave van Oestervant, hertoge Aelbrechts soen int belegge, ende

[p. 231r]

maecte een bystant tusschen hem beyden, II jaer lang durende op deser condicien ende voerwaerden: Als dat die here van Vianen soude resigneren ende overgeven here Ot van Arkel dat slot ter Ameyde, mit alle sine toebehoren ende rechten, behoudelic dat die here van Arkel soude lenen den here van der Ameyde die somme van XVI M Rijnsce Gulden. Ende waert sake dat hi hem dese penningen wedergave binnen II jaren, so soude die heere van der Ameyde sijn slot mit alle sine heerlicheden ende jurisdictien wederhebben, dat welke also is geschiet. Ende als dit bestant van II jaren uut was ghegaen, togen die poorters van Gorichom uut int lant van Vianen mit vele gewapents volcx, verbrandende ende verwoestende alle dat si vonden. Die here van Vianen is uutghegaen met alle sine macht, ende ghing hem te ghemoet in Lakervelt, mit bannieren, trompetten ende basunen; ende dat meeste deel van den poorters van Gorichom worden gheslegen, ende dander namen die vlucht. Ende daer worter also vele gevangen, dat die here van der Ameyde hem alsoe veel ghelts ende goets ofscatte, dat hi daermede loste sijn versette casteel ende heerlicheyt van der Ameyde. Ende dit oerloge worde namaels opgenomen ende gesoent. In datselve jaer op des Heylich Cruysnacht Verheffinge, doen verbrande bina, van haer selfs vier, dye stede van Gorichom. Ende des tsjaers daeran doen sette hertoge Aelbrecht in sinen name ende stede joncheer Jan van Arkel te wesen sine stedehouder van Hollandt, Zelandt ende Vrieslandt.