Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe die stede ende tslot te Montfoerde beleghen worde.
Dat XXXIII capitel.

Daerna, als in den jare M CCC ende LXXXVII, des dages na Sinte Gregoriusdach, toech biscop Floris van Uutrecht, ende

[p. 230v]

beleyde mit groter heercracht dye stede van Montfoerde, want die burchgrave, here Henrick van Montfoerde, onderwant hem des biscops hoge gerechten binnen den lande, stede ende dorpen des heerlicheits van Montfoerde, ende hi benam der ecclesien thienden ende goeden ende der burgeren erve, goeden ende landen, ende andere vele onredelicke saken, die hi hem in den Stichte onderwant angaende den biscop ende der stadt van Uutrecht. Ende die biscop hadde daervoer doen oprechten een grote blide, die stenen werp van XIII C ponden swaerts, ende noch XVI grote steenbussen, daer dye minste off werp stenen wegende CC pont swaers, behalven alle die andere cleine steenbussen ende cloeveren, daer si dagelicxs die stede mede bescoten ende anstormden; ende deden den poerters van binnen vele verdriets ende molestacie, ende hadden noch gemaect instrumenten van thienden, mit aerde ghevolt, dye men Tumelaers hiet, die si stelden op die canten van der stedegraften, daer si hem achter stelden, dat men se uut die stede niet beschieten en mochte. Ende hadden noch doen maken II grote houten wercken, mer dair en bedreven si nyet mede. Die burchgrave mitten sinen scoten mit allen vreselicken weder uuter stede mit grote bussen, mit cleyne gescutten van cloeveren ende armborsten, daer si vele luden⁴⁵² mede quetsten, die onbehoet int heer ghinghen. Ende die biscop lach daervoer omtrent XVI weken ende hadde die stede ende dat huys sere gequetst ende gebroken mittet worpen van den stenen. Ende binnen deser tijt quam biscop Aernt van Ludick, dye der burchgraefinne van Montfoerden oem was, ende nam dese sake ende twist op, ende determineerde die sake in aldusdaniger manieren: Also die burchgrave van Montfoerde noch sine voervaders nye gheen hoghe gherecht gehat noch gebruyct en hadden, noch voirtan hebben noch gebruyken en sullen. Mer die biscop van Uutrecht, die nu is oft namaels wesen sal, die sal gebruyken alle hoge gherechten in den kerspel, ban ende ambochten des lants ende heerlicheits van Montfoert, ende tot allen wegen ende plecken daer die burchgrave gerecht heeft binnen den Stichte van Uutrecht te gaen sine clockeslach, sine panders te riden, sine daechbrieven te senden, van maechgelde te rechten, ende voirt alle saken te berechten die der hogher heerlicheyt toebehoren. Ende die burchgrave ende sine luyden ende ondersaten sullen voertan goede ghetrouwe Stichtsluyden bliven tot ewighe daghen. Ende die stede ende die burch van Montfoerde sullen altijt den biscop open wesen, hem mede te behelpen als hij des te doen heeft, ende noch veel meer ander ponten, dye daer uutgesproken ende geseyt worden, also die dadingsbrief dat breder inhout ende begrijpt, besegelt mit des biscops zegel ende des abts van Sint Truyen ende des burchgrave van Montfoerde mit noch X edele mannen segelen, sijnre vrienden ende magen ende swaghers. Daernae, int selve jaer, sloech Bomel Janssoen enen man ter doot, geheten Aernt die Schermer, binnen der stede van Montfoerde. Doe quam des biscops maerscalck ende haelde desen hantdadigen dootslagher uut Montfoerde, ende brochten tot Uutrecht; ende setten ter justicie, ende hi werdt verwijst dat men onthoefden soude, dat also gheschiede.

452 lnden AB.