Hoe hertoge Aelbrecht troude sijn anderde wijf.
Dat XXXI capitel.
Int jaer M CCC ende LXXXVI, omtrent Vastelavont, versceyde van deser werlt die doerluchtighe vrouwe Margriete van Bryge, hertoge Aelbrechts geechte huysvrouwe. Ende si worde mit betamelicker eeren ende costen begraven in dye capelle opt hof in Den Hage, ende leit in een costeliken tombe an die noertsiden van dat Hoghe Outaer. Ende na haer doot bleef hertoge Aelbrecht vijf jaer lang onghehijlict, ende hadde een boele geheten joncfrou Alijt van Poelgheest, daer na of gheseyt sal worden, na welken doot hertoge Aelbrecht tot sinen anderden gheechte wive nam Margriet, des graven Adolfs dochter van Cleve; mer si en hadden geen kinder te samen. Dese vrouwe Margriet van Cleve stichte ende fondeerde een cloester van der Predicaers Oerde in tsGravenhaghe, ende daer worde sy begraven an dye noertsyde des Hoghen Outaers, onder eene costelicke ende ghecyerde tombe.
Auteursrechtelijk beschermd