Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe here Aernt van Hoerne, bisscop van Uutrecht, gheset worde tot Ludick, ende van Floris van Wevelichoven.
Dat XXIX capitel.

Nadat here Jan van Arkel als een mogende biscop dat Sticht ende die kercke van Ludick strenghelicken hadde berecht XIIII jaer lang, is hi ghestorven in den Here opten eersten dach van julio, int jaer Ons Heren M CCC ende LXXVIII. Die in sine Stichte dat hi wilen eer hadde geregiert worde ghebrocht, ende wert mit betamelicker uutvaert begraven tot Uutrecht in den Dom. Ende alsdoe koren die ecclesie der kercken van Ludick heere Aernt van Hoern, bisscop tot Uutrecht, ende deden grote supplicacien⁴⁵¹ ende beden an den paeus Urbanus dye VI, dat si vercregen die confirmacie van hem, naedat hij dat Sticht van Uutrecht omtrent seven jaer eerlick hadde berecht. Ende dye paeus versette desen heere Aernt van Hoern, bisscop van Uutrecht, te wesen biscop van Ludick, ende hi sette here Floris van Wevelichoven, biscop van Munster, te wesen biscop van Uutrecht. Mer biscop Aernt, die gaerne dat bisdom van Uutrecht mede hadde gehouden in commendis, en woude hi dat bisdom van Uutrecht niet resigneren, of men moste hem ten minsten assigneren ende gheven een jaer renten tot sijnre behoef. Ende aldus, mits hulpe here Willems van Abcoude, here Ghijsbrecht van Vianen ende meer andere ridderen ende edelen van den Stichte, hilt hi desen heere Florijs van Wevelichoven, die sijn bisdom goedertierlick ende simpelic hadde overgegeven ende

451 supplitacien AB.

[p. 229v]

ghelaten, volna een gans jaer crachtelic uut sinen Stichte ende bisdom verdreven. Ten lesten des tsjaers daeran, bi hulpe ende bystant des heren van Arkel ende des heren van Yselstein ende meer andere, worde dese here Floris van Wevelichoven op Sinte Willeboertsdach, als een goet harder ende pastoer van sine onderstaten in sijn stat van Uutrecht mit groter eren ende feesten gheleyt ende geset in sinen biscoplicken cathedraelsetel mit groter solemniteyten, ende worde na ouder manieren introniseert ende geordineert die vijftichste bisscop van Uutrecht. Dese here Florijs regeerde langen tijt dat Sticht tUtrecht wijslijck ende strengelic. Hij was een out, ghedaecht man, van veel jaren, eerbaer ende in die Heylighe Scriften seer wel gheleert, ende wijs in rade, ende devoet in den diensten Goeds. Men seyt dat dese biscop Floris leefde sere heilichlic, ende plach alle dage te lesen een vighelye van IX lessen voer die sielen sijnre ondersaten, die hem bevolen waren. Ende als hem worde gevraecht waerom dat hi hemselven so moeylic was, mit soe veel dagelicxs te lesen, antwoerde hi, ende seyde: 'Ist nyet van node dat een goet harder, dien veel schapen bevolen sijn, dat hij sorchvoudich is voer sijn scapen; is die nu sorchvoudich voir sijn scapen, dunct u dan onghelijc te wesen dat ick naerstich ende sorchvoudich bin om mijne scapen ende ondersaten hulp ende troest te gheven mit ynnighe ghebeden ende oratien dye mij bevolen sijn?'