Hoe die biscop dat casteel Loenresloot bevacht, ende van een monster dat binnen Uutrecht geboren worde.
Dat XXVIII capitel.
Int jaer M CCC ende LXXVIII, doe quam heere Aernt van Hoern, bisscop van Uutrecht, mit heer Willem van Abcoude, here Sweer van Gaesbeeck, sijn broeder ende here Ghijsbrecht van Vianen, mit meer andere ridderen, edelen ende schiltknechten, ende beleyde dat slot te Loenresloet, omdat heere Splinter van Loenresloet, ridder, uut sijn casteel voerseyt die van Uutrecht grote scade ende hinder daghelicxs dede. Ende dye bisschop hadde daervoer gebrocht vele diversse instrumenten ende ghereetscappe om dat slot mede te winnen ende te becrachtigen. Mer het worde gedadinct, als dat here Splinter dat huys ende slot soude setten in des biscops handen; ende voert soude hi staen tot declaracy ende segghen der ecclesie van Uutrecht, ende des ridderschaps des Stichts van Uutrecht. In ditselve jaer, omtrent Sinte Martijnsdach te midsomer, worde in der stat van Uutrecht geboren een kint, ende was een knechtken, datwelcke perfecte ende besceyden woerden sprac alst XL daghen out was, ende seyde tot eenre tijt: 'Doet op dye doerre, mijn vader is hier', ende meer andere woerden. Mer anders en seydet niet, dat den bueren kenlic was, of bi avontueren die ouders en woudens niet openbaren. Dair die ouders sere of verwonderden. Tot eenre tijt baden si enen priester dat hi heimeliken comen woude ende besweren dit kint. Ende als hi misse hadde gedaen, hilt hi sijn ornamenten an, ende toech daerover enen langhen heuck, dat mens niet mercken en soude, ende quam ende beswoer dat kint met vele conjuracien ende besweringen. Mer dat kint en antwoerde niet. Ende ten lesten keerde dat kint sijn hoeft omme, ende sach den priester mit enen gryselicken gesichte an, daer die priester sere of vervaerde. Ende als hi sach dat hi niet en vorderde mit besweringe ende devote gebeden te spreken, ghinc hi weder sinen ghanck. Dit vertelde dye priester vele luyden, hoe hi gevaren hadde. Dit kint leefde XIII jaren lang, mer oft langer leefde en weet ic niet. Bi avontueren so was dit kint een voerbode van een quaet avontuer hierna volgende.
Auteursrechtelijk beschermd