Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat hertoghe Willem van Beyeren, die men hiet die Dolle Grave, oflivich worde, ende hoe hertoghe Aelbrecht ghehult worde.
Dat XXVII capitel.

Daerna, int jaer M CCC ende LXXVII, so starf te Kenout in Henegouwen hertoge Willem⁴⁵⁰ in Beyeren, keiser Lodewijcs soen van Romen, grave van Henegouwen, Hollant, Zeelant ende Vrieslant, wiens lichaem gevoert worde te Valenchijn in Henegouwen, ende worde dair mit groter eerlicheit begraven; ende hi en liet gheen kinder achter. Ende die begraven wesende, so namen die baroenen, ridderen ende edele van den landen van Henegouwen, Hollant, Zeelant ende Vrieslant hertoge Aelbrecht in Beyeren, palensgrave opten Rijn, des voerseyden hertoge Willems broeder, tot enen rechten here van den lande. Ende worde nu weder van nyewes ghenomen ende ghemaect die XXIII grave van Hollant, Zeelant ende Vrieslant, ende grave van Henegouwen, ende hi worde gehult in allen steden, ende dede sinen eedt ende nam weder van sinen vasallen ende leenmannen trouwe ende eet, alst gewoenlic is. Dese hertoge Aelbrecht, willende vermeren den dienst Goeds, gaf Onser Liever Vrouwenbroeders tot Haerlem een scoen wonderlic glas, dwelck gheset worde int oesteynde vant choer, boven tHoghe Outaer. Ende hi hadde uuten selven convente genomen eenen notabelen ende gheleerden man, doctoer in der Heyliger Scriften, tot eenen biechtvader, gheheten broeder Willem van tsGravensande, doer

450 Willen AB.

[p. 229r]

wiens instancie ende ingheven dye vernoemde doerluchtige prins om dat loen des ewigen salicheits gheoffert heeft Onse Lieve Vrouwe een casuffel van een root gulden stuck, ende die yseren doerre voer den sacristye, ende een graduael van den gehelen jare, ende meer andere gaven die hi den voirscreven convente gaf.