Hoe die grave van Ghennip quam voer Wagheninghen, ende van sine sonen ende gheslachten.
Dat XXVI capitel.
Int jaer Ons Heren M CCC ende LXXXI, omtrent Meydach, quam grave Reinout van Ghennip, here Dircxs zoen van Bredenroede mit veel gewapents volcx ghereden in die Velue bi Wagheningen, daer hi ving here Henrick van Hoemoet, ridder, ende den joncheer van Borchlo, mit meer andere edele ende vrome sciltknechten. Ende des tsjaers daeran, als here Dirc van Bredenroede, sijn vader, gestorven was, soe is dese grave Reinout, sijn outste soen, gheworden heere van Bredenroede. Dese grave Reinout van Ghennip ende heere van Bredenroede wan an sine huysvrouwe des graven van Ghennip enighe dochter IIII sonen, als Dirc, Jan, Walraven ende Willem. Dirck die heeft die werelt ghelaten ende worde een Carthuser te Diest, dair hi devotelic in leefde alle die dagen sijns levens. Jan, die ander soen, is den vader na ghevolcht in der heerlicheyt, ende hadde te wive Johanna, des heren dochter van Abcoude ende van Wijck te Duersteden; mer si en hadden gheen kinder tsamen. Dese begaf oec die werlt, ende ghinck in dat Carthuser cloester by Uutrecht int jaer M CCCC ende II, mer hij en volherde daer niet in. Na desen quam die derde soen Walraven, dye bi sinen wive Johanna, heren Henricxs enighe dochter van Vianen, hadde Reynout, here van Bredenroede, Vianen ende Ameyde, burchgrave van Uutrecht; ende here Ghijsbrecht, domproest in den Dom tUytrecht, ende nae elect van Uutrecht, dat hi biscop David overgaf; ende een dochter, vrouwe van Waerdenburch, Ameroyen ende Broechusen. Die IIII soen, joncheer Willem enGa naar voetnoot449 hadde bi sinen wive gheen kinder. Here Reynout van Bredenroede hadde te wive eens heren dochter uut Henegouwen, daer hij an wan heere Walraven van Bredenroede, Vianen ende Ameyde. Dese here Walraven hadde eerst te wive des heren dochter van der Vere; daerna nam hi te wive des graven dochter van Nyenraer uuten Stichte van Coelen.
Auteursrechtelijk beschermd