Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat casteel Puttenstein gedestrueert worde.
Dat XXV capitel.

Op Sinte Vitus ende Modestus dach, int jaer M CCC ende LXXV, heeft heere Aernt van Hoern, bisscop van Uutrecht, mit die steden van Overysel mit heercracht beleyt dat slot van Puttensteyn, omdat Herbern van Puttenstein die van Campen ende andere luyden geseten int Oversticht grote injurie van roven ende vanghen hadde ghedaen. Die bisscop hadde doen oprechten een grote magnele, dair hi die toernen ende muren vant castele sere mede quetste ende destrueerde. Daerentusschen so hebben hem die vrienden ende magen van den voerseyden Herbern tesamen ghesteken, ende vergaerden vele volcxs om den biscop van den belegghe te slaen oft eenen strijt mit hem te vechten. Datwelcke als dye van Uutrecht vernemende doer brieven ende boden des biscops, senden hem terstont in sinen hulpe CC scutten ende CC andere ghewapende. Die ander dit vernemende, en quamen si niet dat huys te ontsetten, waerom Herbern, die sere opten huyse benaut worde, presenteerde ende boet dat huys op te gheven in des biscops handen,

[p. 228v]

datwelcke also gesciede op Sinte Pieters dach, den eersten van den Oest. Dye bisscop dat slot inghecreghen hebbende, dede dat ter aerden toe neder werpen ende slechten totten gronde toe. Ende Herbern sende hi gevangen binnen Campen, want hi hadde gheloeft te onderhouden voer hem ende sinen vrienden des biscops seggen ende uutsprake. In ditselve jaer verbrande die stede van Scoenhoven mit dat cloester van Onser Liever Vrouwenbroeders.