Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe Ghildenburch beleghen worde.
Dat XXIII capitel.

Des daghes na Meydach int selve jaer, hertoge Aelbrecht verhorende die grote hoemoet ende scade die die Stichtse in sine landen hadden gedaen, namt sere qualicken, ende vergaerde veel volcxs van wapenen, ende toech die Lecke op. Hi hadde bi hem vergadert groot machtich volck, ende hadde bi hem grave Jan van Boloys, grave Adolf van Cleve, mit meest die baenreheren, ridderen ende edelen der landen van Henegouwen, Hollant, Zeelant, Gelre ende van Cleve. Ende comende voer dat huys te Ghildenburch, beleyde hij dat mit heercracht, ende sijn heer ende leger gheordineert wesende, dede hij oprechten een groot swaer ende hoech instrument voir Ghildenburch an die oestside, ende een clein an die westsyde. Die opten burch waren, dye waren te voren van als overvloedich wel versien van dat hem van node was, ende schoten mit eenre bussen op dat cleine werck also crachtelicken daert op gerecht stont, dattet hemluyden niet meer hinderen en mochte. Ende VIII dagen daerna, so sijn here Ghijsbrecht van Vianen, here Henric van der Ameyde, Ghijsbrecht van Nyenroede, ridderen, mit vele ridderen ende schiltknechten al seer na gecomen dat casteel van Ghildenburch, omme een scermutsinge te maken mitten borchsaten voer dat huys. Die capiteinen dit siende, als Pieter Dool ende Aernt Preeus, deden dye poorten op, ende si ghingen in een grote menichte van den huyse, wel gewapent ende besprongen die Hollanders voerseit, ende schermutsten sere lange daertegen, ende si namen ten lesten gevangen here Ghijsbrecht van Nyenroede; Willem van Naeldwijc, maerscalck van Hollant; Willem van Gheervlyet, ende een edel ridderman uut Henegouwen, met noch XXVIII soudenyers. Doen dede dye hertoge noch oprechten II grote magnelen, van denwelcke hi den eenen dede setten opten oever van der Lecke bi Vianen, ende dander beneden den dijck van der stede van Vianen, daer hi dat casteel Ghildenburch sere mede quetste ende destrueerde. Ende als hij dat voergeburcht van den castele sere hadde te broken, so worde here Ghijsbrecht ghenesen van den slagen ende wonden die hi hadde ontfangen, ende heeft enen vasten pays ende vrede tusschen beyden ghemaect, als dat die borchsaten souden den hertoge geven ende leveren Ghildenburch, behouden hoer lijf, dwelcke also geschiede opten eersten dach van junio. Ende si souden ongelet trecken op goeder geloven binnen der stat, ende namen mit hem IX doden die si opten huyse gecregen hadden, ende begroeven die tUytrecht opten kerchove. Des anderen dages, als die sonne was opgegaen, so heeft die hertoghe dat huys in sijne handen gecregen, ende hi gaf dat te bewaren op goed ende vaster trouwen ende sekerheyt heere Ghijsbrecht van Vianen. Ende doen toech dye hertoghe wederom mit groter eren ende victorien na Hollant toe.

Daerna, int selve jaer, op Sinte Thimotheus ende Simphorianus nacht, die van Uutrecht sere swaerlick nemende dat si Ghildenburch dus overghegeven hadden, sijn gecomen in der doncker nacht al stillicken mit enen groten gewapende hope volcxs ant casteel Ghildenburch, ende bestormden dat mit bussen ende bogen enen gehelen dach ende nacht, ende si scoten ten lesten dat vier daerin op dene side, dwelc si niet uutdoen en mochten, ende worden mitsdien gedwongen dat casteel over te geven in des bisscops handen ende der stadt van Uutrecht. Want opten huyse en waren niet meer dan XXIII ghewapende mannen, ende noch twe, die in den stormen doot gebleven

[p. 227v]

waren.

Daerna XIIII dagen, quam die hertoge weder al heimelicken die Lecke opgevaren, opnemende dat hi dat casteel Ghildenburch soude bestormen ende te gronde doen ofwerpen. Dit vernemende die van Uutrecht sijn van stonden an gevaren met veel scepen geladen mit vitaelge, ende brochtent die borchsaten, ende versagen hen van als des hem van node was. Ende si lieten daerop vele vrome wapentuers, als Otte van Sconouwen, Willem van Ceets, ende Goeswijn van Vauderic. Ende als si alle ding wiselicken hadden beschict, togen si weder in der stat van Uutrecht. Ende als si vertogen waren, quam die hertoge die Lecke over gevaren mit sijn heer, ende siende dat hi niet vele voerspoets voer Ghildenburch soude bedriven om die voirsichticheits willen die hem was ghedaen, is hi mit al sijn heer ghetoghen voer tslot van Wuelvenhorst; ende als hij dat mit crachte hadde gewonnen, is hi ghetogen voer tslot te Holenstein. Die borchsaten ontsiende des hertogen mogentheit, gaven hem op behouden haer lijf; ende doen toech hij voert voer dat huys te Heermalen, dwelcke hi verbarnde. Ten leste worde daer enen pays ende vrede ghemaect tusschen dat Sticht ende den hertoge in deser manieren: Als dat die van Uutrecht souden den hertoge gheven voir sine schaden ende voer haer misdaet IIII M Oude Schilden. Ende angaende die heerlicheit van Vreeswijck worde geseit ende uutgesproken, waert sake dat die bisscop ende noch VII notabele mannen sweren wouden dat die heerlicheyt van Vreeswijck toebehoerde Sinte Martijn ende der kercken van Uutrecht, dat voertan hertoge Aelbrecht ende sine nacomelingen hem des niet en souden onderwinden. Ende als die biscop mitten VII personen daer bereyt stonden om te sweren, doen was die hertoge tevreden, ende en woude den eedt nyet hebben, ende hij gaf den bisscop ende der ecclesie goede beseghelde brieven van den heerlicheyt van Vreeswijck, ende resigneerdet, ende gaft den biscop over. Ende mits desen souden alle twisten ende geschillen tusschen hen beiden nedergheleyt wesen.