Van den oerloghe tusschen dye van Uutrecht ende Hollant.
Dat XXII capitel.
Omtrent XIII dach int jaer M CCC ende LXXIIII, doen wast een grote vloet ende opwater, comende van boven uuten gheberchten ende rivieren, datwelcke in vele landen, vele steden ende dorpen destrueerde ende te nyete brocht. Ende dat eylant in Hollant, geheten Ryederwaert, brack in bi Dordrecht, ende die dyken van der Lecke, overmits groten last van den wateren, braken mede in; ende dat water vloeyde over al Hollant. Op dieselve tijt voeren die raden van Uutrecht uuter stat mit scepen overlant, wanttet al onder was, ende quamen in Den Hage om te voldoen hertoge Aelbrecht die somme van penningen vant huys te Vredelant, als voersproken ende determineert was. In welker betalinge die hertoge sere began te discorderen ende te twisten teghen die van Uutrecht om der munten willen van den penningen die hem quamen. Ende die raden van der stat togen mit toernigen moede weder tUytrecht, vertellende haren burgeren dat si gesien ende gehoert hadden; waerom die III staten van den landen concludeerden ende sloten eendrachteliken mit malcander dat si also veel ghelts als men nu van hen meer eyschende was van den Hollanders mit cracht weder souden crigen ende verhalen. Ende sijn toegegaen, ende maecten hem rede int harnas, ende togen uuter stat, in der Vasten des selven jaers, ende ghingen leggen voer die stede van Woerden, ende meenden dat te bedwingen, dat si hem souden moeten opgeven. Ende als si dat niet crigen en mochten, verbranden si die voerstede ende enige bolwercken ende starcten, ende namen sommige scamele luyden gevangen die daer omtrent woenden; ende vandaen togen si voer thuys te Cronenburch. Ende also die burchsaten niet versien en waren van enigen dingen, gaven si hem op, ende si worpent ter neder ende brakent of, ende toghen doe voert mit heercracht voer die stede van Wesop, Muden, Uutermeer ende Loesdrecht, daer si bor-
Auteursrechtelijk beschermd