Hoe dat huys Ghildenburch getimmert worde.
Dat XXI capitel.
Int jaer Ons Heren M CCC ende LXXIII, doe dede dye stat van Uutrecht schieten ende graven enen vaert, die men hiet die Nyen Vaert, tot Groter Wade toe, ende ordineerden bi teinde van der Lecke II grote houten slusen int dorp van Nyevaert, ende lieten daerbi timmeren opten oever van der Lecke in Uuterdijck enen groten stenen toren, mit vele anginen, mit andere starcten ende bolwercken wel bewaert, in manieren van een casteel, opdat die II slusen van hair vianden niet verdestrueert noch verwoest en souden worden. Ende dese toern ofte casteel deden si hieten Ghildenburch, wanttet die ghilden tot haren costen hadden doen timmeren. Ende here Ghijsbrecht van Vianen, die dat swaerlic nam, dochte in hemselven oft die van Uutrecht hierna tot enigen tiden sine vianden worden, dat si heimelicken mit gewapender hant mochten comen doer die slusen ende verwoesten zijn heerlicheden. Ende hi beriet hem cloeckelick, ende is gereyst tot hertoge Aelbrecht, graef van Hollant, ende gaf hem te kennen ende informeerden, dat dat casteel van Ghildenburch ware ghetimmert in prejudicie ende achterdeel des graefscaps van Hollant, angesien dat si dat geset hadden in den ban ende ambocht van Vreeswijck, dat welke gheen Stichts, noch den biscop toe en behoerde, mer het was der graeflicheit van Hollant. Daerenboven meenden die van Dordrecht mede dat dese slusen waren in achterdeel van horen stede geset, ende adhereerden ende vielen mitten here van Vianen toe, opnemende dat si tesamen souden trecken ende destrueren dese slusen, als hierna gheschiede ende geseit sal worden.
In dit selve jaer, doe toech Willem van Naeldwijc, maerscalc van Hollant, uut beveel hertoghe Aelbrechts mit veel scepen ende ghewapents volcs in Oest-Vrieslant, ende quam op Sinte Lourensdach ant eylant gheheten Schellinck, ende verbrande dat, ende nam mit hem enen groten roef ende vele gevangen, ende quam weder ongeschent in Hollant.
Auteursrechtelijk beschermd