Van here Aernt van Hoern, dye XLIX biscop van Uutrecht.
Dat XX capitel.
Op Sinte Jans dach Gheboirtenis, te midsomer, int jaer Ons Heren M CCC ende LXXI, doe worde oflivich here Jan van Vernenburch, biscop van Uutrecht, als hi dat bisdom mit grooter eeren VII jaer hadde berecht; ende worde mit betamelicker uutvaert begraven in die Domkercke. Ende also hi haestelicken starf, meent men dat hi vergeven was. Ende als hi begraven was, vergaderden die capitelaers omme te kiesen enen anderen biscop in sinen stede. Dat ene deel van den capittelaers coren Sweer Uuterloe, proest in den Dom tUytrecht, een ongeleert ende waerlic man; waerom dat dat meerre deel van den capitelaers desen niet kyesen en wouden, ende refuteerden hem; ende nochtans dat capittel van Deventer hebben hem mede gecoren. Ende als dese tidinge quam te Romen, ende Urbanus, paeus, die V, dat verhoerde, als datter dissencie ende twedracht was onder den capitelaers, ende dat die kercke van Uutrecht stont ende vaceerde sonder harder ende biscop, so heeft hi een doirluchtigen ende notabelen clerck ende edelen man, heren Aernt, des heren soen van Hoern, gheordineert ende geset te wesen biscop van Uutrecht, die doentertijt te Rome was, ende worde dair tot enen biscop gewijt. Ende doe quam hi neder, ende worde op Sinte Michielsdach daerna in des biscops stoel geset, ende worde gemaect die XLIX biscop van Uutrecht. Dese here Aernt van Hoern biscop van Uutrecht, bloeyende in sine jonge joecht, heeft dat bisdom beswaert ende belast bevonden mit menigerley schulden mits dye XVI duysent Oude Schilden die gegeven worden voer die ghevangenisse sijns voersaet, heren Jans bisscop van Uutrecht; waerom dat met gemenen raet gheordineert worde dat here Aernt, die biscop, soude dat bisdom vry ontfangen ende soude ordineren sekere ende bequame borghen om die voerseyde somme mitten anderen sculden te betalen. Datwelcke also is gheschiet; want die biscop nam tot eenen borghe Sweer, heer van Gaesbeeck, die jonger soen van here Ghijsbrecht van Abcoude; ende hi sette den voerseyde Sweer sinen neef, bi consent ende wille der staten des lants van Uutrecht tot enen rechter ende bewarer des casteels van Vredelant ende der dorpen daeronder gheleghen, met sulcker condycien ende voerwaerden, dat hij dat slot te Vredelant tot ghenen tiden van den Stichte en soude vervreemden, noch dat hij den Stichte daeruut soude
Auteursrechtelijk beschermd