Hoe die here van Adingen worde onthoeft in Henegouwen, ende van der fondacie des collegye in den Hage opt hof in der capelle.
Dat XVI capitel.
Des tsjaers daerna van LXVII was groot oerloge in Henegouwen; ende die sake was dese: hertoghe Aelbrecht doer quaden anbrengen ende ingeven van enige valschen tongen hadde des tsjaers te voren doen vangen een banreheer, geheten den here van Adingen in Henegouwen, ende hadde hem doen rechten mitten swaerde tot Keynout in Henegouwen; want hem was angebrocht, dat die here van Adingen hadde in zijn stede ende slot van Adingen sekere instrumenten van ladderen ende andere gereetscappen om steden ende sloten in Henegouwen mede te winnen ende te beclimmen. Ende als die here van Adingen onthoeft was, is daer een groot rumoer ende opstal in den lande opgeresen, want die here van Adingen liet after VI vrome broeders, alle ridderen, die dat lant van Henegouwen mit rove ende mit brande sere verwoesten. Waerom dat hertoge Aelbrecht heeft doen vergaderen vele volcxs van sine ridderscappe ende edelen, ende is mit groter heercracht gecomen in Henegouwen, ende beleide die stede van Adingen. In desen belegge maecte hi vele ridderen, daer uut desen landen van Hollant of waren Dirc van der Lecke ende Bertelmeeus van Raephorst. Ende ten lesten worde dit oerloge opgenomen bi middele grave Lodewijcs van Vlaenderen. Ende daer worde een vrede ghemaect, ende die hertoge nam dese VI broeders in ghenaden, ende si vergaven den hertoghe den doot van haren broeder. Ende des tsjaers daeran, als int jaer van LXVIII, dede hertoghe Aelbrecht fonderen ende stichten tot sijnre ewigher memorien dye canosye ende collegye in Den Haghe.
Auteursrechtelijk beschermd