Wanneer die collegie van Sinte Pancraes tot Leiden worde gefondeert.
Dat XV capitel.
Omtrent dese tijt, int selfde jaer van LXVI, worde gefondeert ende gesticht dat collegie ende canosie in Sinte Pancraes prochikercke binnen Leiden, daer een groter hulper in was een eersaem ende geleert doctoer, gheheten meester Phillips van Leiden; ende daer worden geinstitueert ende geset totter eren Goeds, Sijnre liever Moeder ende des heiligen martelaers Sinte Pancraes XXIIII canonicken van vele diversse personen gefondeert, gedoteert ende begaeft, daer dese die princepaelste of zijn: Here Ghijsbrecht van Walenborch, pastoer van Leyderdorp, ende deerste proest van desen collegie; meester Phillips van Leiden, doctoer voerseyt; heere Volpert van den Woude; heer Claes van Bleyswijck; here Huge van der Hant; here Phillips Gerritssoen; heer Rutgher van den Poel; heer Gerrit Jacobssoen; heer Willem Heerman; heer Pieter Hoesch; here Huge, cureit van Scorel; here Jan Willems soen; heere Vranc Siverssoen; here Jan Ghoet; here Dirc Robbrechtssoen; here Vranc Gherritszoen, priesteren; Willem van Naeldwijc, maerscalc van Hollant; Jan Aerntssoen; Willem Willemssoen; Michiel Gherritssoen; Dirc Tyerloet ende Katrijn Gherrits dochter, waerlicke personen.
Auteursrechtelijk beschermd