Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe hertoghe Aelbrecht in Vrancrijck reysde totten coninck, ende hoe Amersfoert belegen worde.
Dat XIIII capitel.

Des tsjaers daeran heeft hertoghe Aelbrecht van Beyeren, palatijn opten Rijn, voecht der graefscappen van Henegouwen, Hollant, Zeelant ende Vrieslant, vergadert eenen uutgelesen hoop sijnre baenreheren, ridderen, edelen ende sciltknechten, ende is mit een scoen geselscap gereden tot Parijs, totten coninc Kaerle, coninc van Vrancrijc, die men hiete die Wise. Die coninc heeften ontfangen mit groter eren, ende behilt hem een wijl tijts bi hem mit grooter triumphen ende solemniteyten, hem festiverende. Ende als hi sijn bootscap hadde volbrocht, reysde hi mit groter eeren weder thuys, ende quam in Henegouwen. In ditselve jaer so rebelleerden die van Amersfoert tegen heren Jan van Vernenburch, horen heer ende biscop, sodat si niet alleen

[p. 225r]

den biscop weygerden te betalen sine tollen ende chysen van den grute ende anders thijnsen ende bisscoppelicke renten, mer waren sine openbaer vianden ende rebellen, ende en wouden niet kennen voer haren here. Die biscop dede vergaderen vele vrome wapentuers ende knechten, opdat hi midts deser hulpe die van Amersfoert weder soude brengen tot sijnre obediencie ende onderdanicheit. Ende is gecomen op Sinte Margrietendach, ende beleide die stede van Amersfoert, ende sloech dairop sine tenten ende pauweljoenen, ende heefter vele van hemluyden gevangen genomen, als si tegen hem uutquamen te striden. Ende als hi VIII dagen daervoir hadde gelegen, sijn si bi middele van tusschenspreken rustelic tsamen verenicht op sulker voerwaerden, dat die van Amersfoert voertan den biscop, haren here, souden hout ende trou wesen, ende dat si hem ende sine nacomelinghers geven ende betalen souden als si sine voersaten hadden gedaen. Ende die biscop brac op van den belegghe, ende toech binnen Uutrecht.