Wanneer Onser Liever Vrouwenkercke binnen Leiden eerst gewijt worde, ende van enen oncuysschen man die onthoeft worde.
Dat XIII capitel.
Int jaer Ons Heren M CCC ende LXV, des eersten sonnendages na Onser Liever Vrouwen Hemelvaertsdach, worde die eerste kermisse van Onser Liever Vrouwenkercke binnen Leyden gehouden. Omtrent dese tijt was een rijck poorter binnen Gorichom, geheten Henrick Kannemaker, dye seer oncuysch ende luxurioes van leven was. Dese ghinc al heimelic daer hi scone maechden ende jonge weduwen sach, ende sprack daer also mede, hair gevende sine trouwe, op condicien ende voerwaerden dat si binnen een jaer dese heymelicke trouwe nyet openbaren en souden. Ende onder aldusdaniger heymeliker trouwe ende gedaente van warachtiger Sacramente des hijlics ende trouwe, so besliep hi vele maechden ende jonghe weduen. Ende den tijt omme gecomen wesende warender vele geworden mit vruchte, ende dat mitsdien sijn boeverye ende scalcheit openbaer worde. Ende als hi van enige van desen vrouwen voer den geestelicken rechter was gedaecht, so hilt hi daer sijn spot mede, ende en wiste van ghenen trouwe te segghen. Ende als here Otte van Arckel dit vernam, woude hi hem doen vangen, ende swoer bi sine ridderscap, hij souden doen onthoefden. Ende als hi dit vernam, so vloet hi op dat kerchof; mer also dese scalc die Sacramenten der Heyliger Kercken veracht ende bespot hadde, ende hem seer onwiselic daertegen hadde gehat, so worde hi overmits groten honger ende versmachtinge van den kerchove gedwongen te comen, ende hij deden onthoefden, een ander tot een exempel ende leere die Sacramenten der kercken te onderhouden.
Auteursrechtelijk beschermd