Hoe here Jan van Vernenburch, bisscop van Uutrecht, gevangen worde, ende van die grote pestilencie die doe was.
Dat XVII capitel.
Op der Apostelen Avont Sinte Simon ende Jude, int jaer van LXVIII, als here Jan van Vernenburch mit zijn familie ende huysgesin hem houdende was in die stede van Ghoer, int Oversticht, ende die wakers van der stede geen scarpe wake en hilden, so zijn in der nacht gecomen mit gewapender hant des biscops openbaer vianden, als Jan van Swolvis, Simon van Swolvis, Engbert van Zal, Otte van Kenemade, Henric van Homborch; Harman van Twickel, mit meer andere, ende quamen over die mueren in die stede, ende vingen den biscop onversienlic mit XIII van sine knechten, ende Henric van Enthenicht worde daer geslegen, mit noch III ander. Ende niet lange daerna, die biscop worde gecoft mit middele van sine vrienden, ende quam uuter vangenissen voer die somme van XVI M Ouder Schilden, voer welcke somme here Jacob Soudenbalch, abt tot Oestbroeck, Ghijsbrecht, here van Vianen, Sweer van Vianen ende Steven van Nyevelt, ridderen, borge geworden sijn, voer welcke borchtochte ende somme van penningen die biscop wederom versette ende in handen gaf desen voerseiden personen alle dye sloten, diensten ende goeden van den Nederstichte van Uutrecht, ende daerenboven dat slot van Vollenhoe mit sinen toebehoren, ter tijt toe dat die somme van den penningen betaelt ware. In ditselve jaer was een grote pestilencie, want daer storven binnen der stat van Uutrecht omtrent XI M menschen.
Auteursrechtelijk beschermd