Hoe dat casteel van Voerst gedestrueert worde.
Dat X capitel.
Daerna, int selfde jaer heeft heer Sweer van Voerst ontseyt here Jan van Arkel, biscop van Uutrecht, ende dede uut sine casteel van Keppel vele gewelden van roven ende branden in den lande van Overysel. Waerom dat here Jan van Arckel, biscop van Uutrecht, mit hulpe here Otte, sijns broeders, here van Arckel, ende andere sijnre vrienden heeft vergadert een scoen menichte van ridderscap ende vrome wapentuers, te paerde ende te voet, ende is mit groter heercracht omtrent Sint Jacob getogen, ende heeft crachtelicken beleghen dat slot te Voerst. Ende terstont dede hi daer voer oprechten III grote instrumenten, daer hi den borchsaten sere mede quelde ende molesteerde, ende noch mit bossen, armborsten ende slingeren heeft hi daghelicxs dat huys sere mede bestormt ende benaut. Ende die biscop hadde sere tot sijnre hulpe den hertoghe Eduwaert van Gelre. Dat casteel van Voerst was dat alrestarcste ende onwinlicste casteel dat in alle den hele Ghesticht staende was, want het hadde dubbelde graften ende dye muren waren hoech LXXX voet, ende dicke XII voet. Ende daerenboven haddet noch enen viercanten muer ofte voerbaelge. Ende als die biscop dit voergeburchte hadde ghewonnen stormenderhant, so dede hij daer terstont voer oprechten magnelen ende andere instrumenten, daer hi dat slot mede meende te becrachtigen. Ende heeft mit dese instrumenten die grote sware toornen ghedestrueert ende terneder geworpen, van welke nedervallen die grote sale ende andere timmerraetsen gedestrueert, gebroken ende terneder gevallen sijn geweest. Ende die opten burge lagen hebben hem mit schieten ende mit worpen XV weken lanc vromelic geweert, want si van als te voren wel voersien ende bescermt waren, ende si achten seer clein die destrueringe der toornen ende der muren; ende oprechteden terstont weder andere instrumenten ende starcheden, dair si des biscops grote instrumenten crachtelicken op haer casteel togen, ende haelden ende bestormden die van buten dicwils mit schieten ende werpen. Mer ten lesten, als die borchsaten sagen dat die biscop volherde int belegge, ende dat zijn heer ende macht alle dage groter worde, ende dat si seer vermoeyt worden mit waken ende mit stormen van buten, hebben si den biscop dat slot opgegeven behouden haer lijf, als hi XV weken daervoir hadde gelegen. Ende die biscop dede dat slot ter aerden toe ofbreken ende verwoesten, ende hi is mit groter eren, zege ende victorie weder
Auteursrechtelijk beschermd