Van den oerloge ende twist tusschen hertoge Aelbrecht ende den hertoge van Ghelre, ende hoe si verenicht worden.
Dat IX capitel.
Hertoge Eduwaert van Ghelre, als hi sinen broeder, hertoghe Reynout, in der vangenisse hadde gheset, soe verdreef hi alle dieghene uuten lande van Ghelre dye mit sinen broeder hem tegen hadden gheweest, verwoestende ende vernyelende haer castelen. Diewelcke haer toevlucht namen in Hollant, tot hertoge Aelbrecht van Beyeren, grave van Hollant, ende onthilt se bi hem; waerom dat hertoge Eduwaert van Ghelre toernich was, ende ontseyde hertoge Aelbrecht, ende leyde hem dach ende velt op Heimans Berge mit hem te striden. Doen dede hertoge Aelbrecht vergaderen een scoen uutgelesen ridderscap van vrome wapentuers ende schiltknechten, ende is mit blinckende bannyeren, mit trompetten ende basunen getogen op Heymans Berge, verwachtende aldaer den hertoge van Ghelre, die belooft hadde daer te comen. Ende als die Hollanders saghen dat hi niet en quam, togen si mit al hoer macht int lant van Gelre, ende staken vele dorpen an brande, ende namen enen groten roof mit hem, ende togen weder mitten hertoge Aelbrecht, horen here, mit groten roof ende rijcdom, ende mit vele gevangen in Hollant, mit groten victorien ende triumphen. Daerna worde een vrede tusschen hem beiden gemaect, als dat hertoge Eduwaert van Ghelre te wive hebben soude Katrine, hertoge Aelbrechts dochter, als si tot haren jaren ghecomen soude wesen. Ende dit was int jaer M CCC ende LXII.
Auteursrechtelijk beschermd