Hoe die biscop Jan van Uutrecht enen strijt hadde teghen sine vianden ende ondersaten, ende van enen groten winde.
Dat VIII capitel.
Int jaer Ons Heren M CCC ende LXI, so heeft here Jan van Arckel, biscop van Uutrecht, een groot heer van volc vergadert, ende is getogen teghen dye van Stellingwerf, Steenwikerwout ende Ommelant, omdat si tegen hem menige tijt hadden gerebelleert. Ende daertegen quamen dese voerseide rebelle ondersaten ten stride, ende vochten vromeliken om die sege ende overhant te houden. Mer int eynde worden si vluchtich, ende daer bleeffer mit allen veel doot. Die biscop heeft se starckelick vervolcht, ende vele worter gevangen, ende dede alle haer dorpen ende huysen verbarnen, ende nam enen groten roef mit hem. Ende si gaven hem ten lesten onder des biscops subjectie ende heerlicheit, ende gaven den biscop voer haer misdaet X M Oude Schilden. Mer als die bisscop wech was, so staken hem die van Stellingwerf weder tegen haren biscop, waerom die biscop is omtrent Onser Vrouwen Lichtmisse mit groot volc van wapene weder tegen hem gecomen, ende daer wesende heeft hij haer fortressen ende bolwercken destrueert ende doerreden, ende gaf oerlof den knechten te roven, te vangen, ende staken dat dorp an brande, mit hem nemende vele gevangen ende beesten, gelt ende goet, dat ontellic was. Waerom alle die rebellen daer omtrent geseten horende die victorie des biscops, ghingen in genaden, ende begeerden mitten biscop niet dan vrede ende pays. In datselve jaer, omtrent Sinte Marcellus dach, is alten groten swaren storm van winde opgestaen, ende dat zeewater ghing so hoge, dattet ghenen mensche en gedochte sodanigen storm te wesen. Overmits welcke cracht van winde vele kercktoornen ende kercken, molens ende huysen terneder gevallen sijn. Ende vele dyken omtrent die zee, overmits den starcken ende hogen
Auteursrechtelijk beschermd