Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe die stede van Delft beleyt worde van den hertoge.
Dat VII capitel.

Die hertoge, dese nyemaren verhorende, is mit allen sere toernich geweest, ende moeyde seer desen hoemoet van die van Delft; ende is haestelicken gecomen uut Zeelant in Den Hage, in meninge wesende te wreken dese injurie ende rebelheit die hem was geschiet. Ende heeft van stonden an haestelicken bi hem doen comen alle sine baroenen, ridderen, heren, vasallen, schiltknechten, ende die steden van Hollandt, Zeelant ende Vrieslant, mit alle horen poorteren, ende mit sine soudenyers ende knechten heeft hi die stede van Delft swaerlicken al om belegen, ende quam daervoer des manendaghes na midvasten, ende lach daer voer X weken ende II dagen. Oec mede, so quamen daer den prince ten dienste vele vrome soudenyers ende wapentuers uut allen natyen, om haer soudye, also dat daer een groot, swaer, machtich volc vergadert was. Die hertoghe dede die stede anstormen tot vele plaetsen, mit bogen, mit slingeren ende mit menigerley instrumenten, daer hi vele luyden mede quetste binnen der stede. Ende here Ghijsbrecht van Nyenroede, here Jan van Karvene, ridderen, Henric van Woert ende Gerrit Wis, mit haren poorteren ende soudenyers, bescermden die ombelegen stede vromelicken lange tijt, ende verdreven die vianden van haer muren mit schieten ende worpen, ende sodatter bi wilen vele doden bleven an beiden siden. Mer dat en bate hem luyden niet vele. Want die hertoge volherdende in den belegge, dede oprechten IIII grote magnelen ende andere vreselicke instrumenten, dair hi die van binnen uutermaten sere mede vervaerde ende bedwanc, ende vele scade mede binnen der stede dede; waerom tusschen Paesschen ende Pijnxster, die poorters siende dat die hertoge persevereerde ende stadeliken leggen bleef, cregen verdriet, ende worden mistroestich overmits den lange beleggen, worden te rade pays mitten hertoge te maken dan langer belegen te wesen, ende dan noch pays te maken mit scande ende scade. Die IIII cappeteinen dit vernemende, vergaerden die opperste van der stede in die Oude Kercke, ende spraken aldus: 'Eerbare wise mannen, wilt ons horen ende doen na onsen raet, ende en wilt niet haesten om u stede op te geven; wi raden u, indient u goet dunct, dat wi eerst uutgaen mit allen macht ende vechten enen staende strijt tegen onse vianden, ende besien of wi die mit cracht van den belegge souden mogen slaen; ende ist dat wi die overhant houden, goet ist, ende ist niet, so comen wi altijt vroech genoech mitten hertoge te dadingen.'

[p. 223r]

Waerop si antwoerden: 'Wi en hebben geen sekerheit van der avonturen des victorijs van den stride; ende daerom hebben wi liever vrede te maken sonder strijt, dan of wi verwonnen worden souden in handen moeten gaen.' Daer die IIII cappeteinen op seyden: 'Ons Here God gheve u wisen raet. Mer besiet hier eerst dese openbaer brieven, die ghi ons hebt gegeven, diewelcken inhouden, wanneer ghi wilt buten ons consent vrede maken, dat wi alsdan VIII dagen te voren uuter stede sullen mogen trecken om ons te bescermen ende te versien.' Daer die poorters niet tegen en seiden, mer begeerden vrede mitten hertoge te hebben; so sijn die II ridderen, heere Ghijsbrecht ende heere Jan mit haer soudenyers uuter stede al heimelicken getogen. Ende bi middele ende tusschen spreken here Walraven van Borne, ridder, gaven hem die van Delft op in des hertogen handen, behouden haer lijf ende goet, op dese condicie: Als dat die van Delft souden den hertoge oetmoedelic om verghiffenisse bidden, ende si souden voer haer misdaet den hertoge geven die somme van XL M Oude Schilden, ende dairtoe souden si haer muren van der stede moeten opbreken ende nederleggen. Ende in deser compositie ende dadinge en waren die vreemde gasten ende knechten niet begrepen, mer bleven buten der zoenen. Ende hertoge Aelbrecht worde binnen Delft mit groter triumphen ontfanghen, ende dede terstont alle die muren, poorten ende toornen opbreken ende ter aerden toe slechten. Ende Henrick van Woerd, een van den cappeteynen dye opten kecktoerne gevloden was, worde mit behendicheit van den toren gecregen, ende hij wort onthoeft. Ende die ander, als heere Ghijsbrecht ende here Jan mit haren knechten ende soudenyers namen die vlucht, ende quamen op dat starcke huys te Hoesden, daer si een heel jaer lang op belegen worden. Mer bi middele heren Otte van Arkel wortet gedadinct, ende quamen in des hertogen genade op deser condicien, dat si den hertoge dat slot weder overgeven souden, ende souden noch binnen LI jaren gehouden wesen te trecken tot Jherusalem, ende versoecken aldaer dat Heylige Graf ons Heren. Ende midts deser dadinghe worde alle twist ende gescille van stride nedergeleyt. Ende dese II ridders togen niet alleen ten Heiligen Lande, mer oec mede ten Berge van Syon, totter heyligher maghet Sinte Katrinen.