Hoe dat die van Delft destrueerde dye sloten van Polanen endeGa naar voetnoot446 Binchorst ende van den ghewelde dat si in Den Hage bedreven.
Dat VI capitel.
Int jaer M CCC ende LIX, die van Delft, die goetgonnerts ende vrienden waren der geenre die opt huys van Heemskerck waren belegen, siende dat dat belegge seer benaude haer vrienden, hebben si hem gheset in rebelheit tegen hertoge Aelbrecht, haren rechten voecht, die si geloeft ende gesworen hadden hout ende trou te wesen. Ende si hebben gesonden om cappeteinen ende vrome knechten, dat si soude comen tot Delft, ende dat si hem wilden helpen dragen den last van den oerloge. Ende daer zijn ghecomen IIII vrome edele mannen, als Ghijsbrecht van Nyenroed, Jan, heer van Kervene, bastert van Arkel, ridderen, Henric van Woerd ende Gerrit Wis, sciltknechten; dese quamen binnen Delft mit haer soudenyers, ende deden die stede enen eedt hout ende trou te wesen. Doen deden die van Delft vergaren haer poorteren ende soudenyers, ende togen mit die cappeteinen, mit vele gewapents volcs, ende beleiden dat slot te Polanen ende te Binchorst, ende wonnen die ende verdestrueerdenGa naar voetnoot447 se, ende stieten dat vier daerin, ende verbrande se tot in den gront of. Ende togen doe voirt, mit groter cracht, in des tsGravenhaghe, hertoge Aelbrecht noch in Zeelant wesende; ende sloegen des graven vangenisse op, ende braken stocken ende banden van den gevangen ende prysonyers, ende brochten die mit groter bliscap weder binnen Delft.
Auteursrechtelijk beschermd