Hoe dat huys tot Heemskerc gewonnen worde.
Dat V capitel.
Ende als hertoghe Aelbrecht dit verhoerde, was hi seer gestoert, ende vergaerde van stonden an vele vrome wapentuers ende schiltknechten, ende is getogen op Sinte Martijns avont in den winter daeran int baeljuscap van Kermerlant, ende heeft heeren Wouters huys van Heemskerc al omme starckelic belegen, omdat hi die voerseide quaet dadinge daerop onthouden hadde. Ende hij stelde daer enen vromen cappetein ende stedehouder van dat heer, den heer van Polanen, dye na worde here van Asperen; ende hi toech in Zeelant om sonderlinge saken, die hi dair te expedieren hadde. Ende here Wouter van Heemskerck, ridder, die van als dat hij opt huys behoefde versien was, heeft hem vromelicken vermeten te wederstaen den voerseiden heer van Polanen, ende bescermde zijn huys, lijf ende goet cloeckelicken. Mer here Dirc van Polanen bleef daervoer leggen XI weken lang, ende stormder dagelicxs sonder ophouden an dat huys mit menigerhande instrumenten, dat here Wouter niet alleen zijn huys opgaf in des hertogen handen, mer hij most oec selver in persone trecken mit die daer opt huys waren, ende gaven hem in des hertogen gevangenisse, ende seggen te voldoen van alle sine misdaden, dairof sentencie verwachtende. Ende daerna geleden sommighe jaren worde hi teghen den hertoge versoent, ende hi creech sijn huys tot Heemskerck weder. Ende als hi starf en liet hi geen kinder after, ende dat
Auteursrechtelijk beschermd