Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe des heren soen van Bredenroede lagen geleyt worden om te slaen.
Dat IIII capitel.

Omtrent Bamis int jaer M CCC ende LVIII, so absolveerde ende wederseide hertoge Aelbrecht, Jan van Blomestein, die baeljuscap van Kermerlant, ende sette weder in die stede van hem Reinout, des heren van Bredenroede outsten sone. Datwelke die Hoexs partye sere qualicken ende ovel namen, ende leyden hem lagen in die dunen omtrent Castrichom, daer hi soude comen riden. Ende als die jonghe Reinout, die van desen lagen niet en wiste, gereden quam mit sinen paerden omtrent Castrichom, so sprongen si op uut haren lagen om hem doot te slaen. Ende hi stack sijn paert mit sporen, ende reet snellicken mitten sinen tot Castrichom op dat kerchof, mer si volchden hem so haestelicken dat si III mannen van den aftersten doot sloeghen. Ende als dye van Castrichom dit sagen, grepen si haer wapen, ende quamen haren nyewen baelju te baten; ende die ander reden wech, ende lieten doe den baelju mit vreden. Dit aldus gesciet sijnde, reden een deel van desen dootslagers op heren Wouters huys van Heemskerc, ende een deel quamen tot Delft, die daer ontfangen ende onthouden worden om die gonstelike conspiracie ende verbant dat si te samen hadden ghemaect.