Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van die eerste huysvrouwe hertoghe Aelbrechts ende sine kinderen.
Dat III capitel.

Dese hertoge Aelbrecht in Beyeren, palatijn opten Rijn, here van Nubingen, voecht van Henegouwen, van Hollant, Zelant ende Vrieslant, keiser Lodewijcs soen van Romen ende vrouwe Margriete, der keiserinnen, graefinne van Henegouwen, Hollant, Zeelant ende Vrieslandt, hadde sine ridderlicke oerde ontfangen int Conincrijc van Granaten, daer hi vromelicken vechtende was tegen den ongelovigen heidenen ende Moeren voir die beschermenisse des Heiligen Kerstengheloves. Hi hadde eerst te wive Margriet, des doerluchtigen hertogen dochter van Brigen uut Polen, daer hi an wan III sonen ende IIII dochteren. Die eerste was geheten Willem, grave van Oestervant, ende worde gheboren int jaer M CCC ende LXV, des saterdages voer Palm Sonnendach. Die II soen, geheten Aelbrecht, here van Nubingen, starf jonck. Die III soen, gheheten Jan, ende was gecoren te wesen biscop van Ludic; dese was geboren int jaer M CCC ende LXXIIII. Sine ghevaders waren here Jan van Arkel, biscop van Ludic; here Jan van Hillegom, regael abt van Egmont; die vrouwe van der Lecke, van Putten ende Strenen. Die eerste dochter was geheten Katrijn, die eerst te man hadde hertoge Eduwaert van Gelre, grave van Zutphen. Ende als die ghestorven was, nam si te man also si noch maegt ende wedue was, hertoge Willem van Gulic ende van Ghelre, grave van Zutphen; mer si en creech geen kinder. Die ander dochter, Johanna, nam tot enen man int jaer M CCC ende LXX, Wentzelijn, coninc Kaerls zoen van Bemen, keiser van Romen, dye na oec gecoren worde te wesen coninc van Romen. Mer si en hadden geen kinder te samen. Die III dochter, Margriet, hadde te man hertoge Jan van Bourgongen, Phillips Delehardie soen; dair had si by Phillips, hertoge van Bourgongen ende namaels hertoge van Lotrijc, van Brabant, van Limburch, grave van Vlaenderen, van Artoys, van Bourgongen, van Hollant, Zelant ende Vrieslant; ende Margriet, dalphinne van Vrancrijck, na grafinne van Ritsmont; Katrijn; Maria, hertoge Adolfs wijf van Cleve, deerste Jolent, graefinne van Poutiers; Anna, graefinne van Betvoert; ende Agnies, hertoechinne van Bourbon. Die IIII dochter van hertoge Aelbrecht, Johanna, hadde te man hertoge Aelbrecht van Oestenrijck, daer si enen soen bi hadde, geheten Aelbrecht; ende dese soen Aelbrecht

[p. 222r]

hadde te wijf coninc Segemonts enige dochter van Ungarien, van Bemen, Dalmatien, Croatien, Stirien, Bulgarien, Walachrien ende Comanen, ende was mede keyser van Romen. Ende na keiser Segemonts doot, so nam dese hertoge Aelbrecht alle dese conincrijcken te erven van sijnre huysvrouwen wegen, ende worde oec na gecoren tot enen Roemschen coninck. Mer hi starf corts daerna, ende sijn coninghinne baerde na zijnre doot enen soen, geheten Lansloet, die tot sinen XXII jaren sonder kinder starf. Ende dese Aelbrecht hadde enen neef, sijns vaders broeder soen, geheten Frederijck, hertoge van Oestenrijc, ende worde nae gecoren tot enen Roemschen keiser, geheten Frederic die III van dier namen, ende hadde te wijf des conincs dochter van Portegael; dair hi an wan Maximiliaen, hertoge van Oestenrijck, na Roemsche keiser, die te wive hadde Maria, hertoge Kaerls enige dochter van Bourgongen, daer si bi wan Phillips, aertshertoge van Oestenrijck, hertoge van Bourgongen, etcetera. Ende namaels coninc van Castilgen, van Leons, van Granaten, van sijnre huysvrouwen wegen, vrouwe Johanna, dochter van Coninc Fernant van Arragon ende sijnre huysvrouwe coninghinne van Spangen. Dair hi bi wan Kaerle, aertshertoge van Oestenrijck, etcetera, ende noch enen soen geheten Fernant; ende IIII dochteren, als Alienora, Johanna, Maria ende Elizabeth⁴⁴⁵, etcetera. Van dat ander wijf hertoghe Aelbrechts sal na ghescreven worden.

445 Elizabetht AB.