Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van hertoge Aelbrecht van Beyeren, palensgrave opten Rijn, grave van Henegouwen, van Hollant, Zeelant ende heer van Vrieslant, die XXIII.
Dat II capitel.

[p. 221v]

Ende als hertoge Willem sijnre sinnen dus byster geworden was, ende in sekere vaste hoeden was geset, so is daer weder van nyewes onder den twe partyen een grote twedracht ende discoorde opgestaen; want die Cabbeljaus begeerden tot eenen voecht te setten ende te regieren die landen van Zelant ende Vrieslandt vrouwe Machtelt, dye hertoechinne hertoge Willems huysvrouwe. Ende also die voerseide hertoechinne geen kinder en hadde bi horen man, daerom die edele van der Hoecxs partye gebruykende betere redene, elegierden ende koren tot enen voecht der voirseide landen Aelbrecht, hertoge in Beyeren, palensgrave opten Rijn, here van Nubingen, broeder des voerseide hertoge Willems die dolle grave, van enen vader ende moeder. Ende die heren ende steden van Henegouwen bleven mede bi deser opinie ende electye. Ende si senden uut notabele legaten ende commissarien totten voerseide Aelbrecht, hertoge in Beyeren, biddende ende begerende dat hi uut die name sijns broeders annemen wilde die momberscap ende voechdye der landen van Henegouwen, Hollant, Zelant ende Vrieslant. Ende als hi haer brieven hadde gelesen ende haer woerden ende commissie verstaen, bedroefde hi hem van der siecten ende misvalle sijns broeders. Ende hi heeft hem bereyt, ende is nedergecomen mit een scoen geselscap van baroenen, ridderen ende knechten in Hollant. Ende die heren van beyden partien sijn bi hem gecomen, ende ontfingen hem voer enen rechten voecht ende mombaer der landen van Henegouwen, Hollant, Zeelant ende Vrieslant. Ende daer wort determineeert ende gedadinct, als dat hertoge Aelbrecht uutreyken ende betalen soude vrouwe Machtelt, die hertoghinne, des dollen graven huysvrouwe, haer leven lang gedurende ende nyet langer, die somme van XII M Vrancrijcse Schilden. Ende mits deser composicie ende dadinge worden beide die partien verenicht, ende bleven een weinich tijts in vreden; mer niet lange