Van die oerlogen des heren van Arckel tegen die van Dordrecht, ende hoe dye castelen Everstein, Gaspaern ende Hagesteyn ghetimmert ende gemaect worden.
Dat XI capitel.
Int jaer Ons Heren M CCC ende LXIII, doe worde hertoge Aelbrecht van Beyeren mit groter eren ende triumphen ontfangen van here Otte van Arkel binnen der stede van Gorichom; ende hi onthaelde den hertoge sere feestelic, ende dede een grote maeltijt bereiden daer vele heren ende ridderen, vrouwen ende joncfrouwen geroepen ende genoot waren omme den hertoge te festiveren ende goede chyere te doen. Ende mits desen quam here Otte seer grotelic in des hertogen gracie, ende was seer van den hertoge ghemint ende gheacht, ende hadde veel gehoors. Ende mit deser vrientscappen worden die partyen in Hollant sere ter neder geleyt, want here Otte was een vreetsaem ende een wijs, voersichtich man van groten besceyde, ende die sine ondersaten sere beminde ende bescermde in haren privilegien ende vriheden. Ende in dien tijden was een tolnaer gheseten in Metkenshoeck, bi Dordrecht, die den ondersaten van desen heren Otte mit dagelicxse exactien ende ongewoenlike scattingen sere belaste ende beswaerde. Here Otte dit vernemende was des niet wel tevreden, ende vermaende desen tolnaer II ofte III mael mit brieven, dat hi ofliete sine ondersaten also te bescatten. Die tolnaer achte clein die vermaningen ende brieven van alsulken machtigen here, ende beswaerde soe veel te meer des heren van Arkels ondersaten in der tollen, boven hair privilegien ende vriheden. Waerom here Otte sende een deel zijnre dienres, ende sloegen den voerseiden tolnaer doot. Ende here Otte quam mit sine ridderscap ende knechten in Den Hage tot hertoge Aelbrecht, begerende remissie van sijnre misdaet. Dye hertoge nam den here van Arkel op van der aerden, ende vergaf hem dye misdaet, ende gaf hem noch daerenboven vele scoenre ende meerre privilegien dan hi te voren hadde, ende hi reysde mit groter eren weder na Gorichom. Daerna, op een ander tijt, als dye van Dordrecht dwingen wouden die Arckelse boven haer vriheden die si van den hertoge hadden, dat si tot Dordrecht souden moeten verstapelen, so beval hem heer Otte, haer here, dat si dat in geenre manieren toe en lieten, want het ware in prejudicie ende achterdeel van haerre vriheden. So ist geboert dat een schipper, geheten Boninc, is comen zeylen uut Zeelant, mit een groot geladen schip, na Gorichom toe. Die van Dordrecht quamen uut, ende deden dat schip besetten. Ende als si dit drie mael hadden gedaen, was here Otte sere verstoirt op die van Dordrecht, mer hi simuleerde ende veynsde hem een wijl tijts, sodat die van Dordrecht quamen den Rijn neder gevaren met veel scepen, geladen mit winen. Ende als si quamen bi Gorichom, menende voert neder te varen tot Dordrecht, so quam here Otte van Arkel, ende dede die winen opslaen, ende deelde ende gaf die sine ondersaten, ridderen, heren ende edelen tot een wraeck van dat sine ondersaten van die van Dordrecht was gheschiet. Ende doe voertan lieten die van Dordrecht bi groten bedwange die Arkelse mit vreden varen ende keren, nae inhout haerre privilegien ende vriheden. Dese vrome here Otte van Arkel liet van nyewes opmaken uut die gronde in sijn heerlicheit van Arkel bi teynde van der Lecke een schoen, heerlick casteel, geheten Eversteyn. Ende hi dede die stede van Gaspaerne ende tslot te Hagensteyn mit hogen muren ende toornen ende mit diepe graften ombevesten ende starck maken.
Auteursrechtelijk beschermd