Hoe dat slot te Nyevelt gewonnen ende verbrant worde.
Dat XIII capitel.
Daerna, opten XII dach van mey, hertoge Willem, die sere verblijt ende ghemoet was van deser victorie, is mit groten heercracht getogen int Sticht van Uutrecht, ende sette sijn tenten ende pauweljoenen op een plaetse geheten Die Hogewoert, ende heeftet al verwoest ende vernyelt dat daer omtrent was. Ende hij heeft gesonnen here Jan van Egmondt, mit vele gewapents volcxs, om te beleggen heren Stevens casteel van Nyevelt. Ende als hi sijn belegge voer dat slot van Nyevelt hadde gemaect, so rechte hi daervoer IIII magnelen, daer hi dat slot sere mede anvacht, ende die muren brac. Here steven van Nyevelt, ridder, die hem van als wel voersien hadde, was seer naerstich om hem vromelicken te weren ende te bescermen, mer ten bate hem niet vele. Mer die here van Egmont bleef daervoer leggen VII weken lang, ende hadde doen maken een groot werc van groter hoechten, dair hi dat slot sere mede destrueerde. Ende ten lesten gaf hem heere StevenGa naar voetnoot437 op mit alle die daerop waren, ende ghingen in genaden hertoge Willems. Die Hollanders, als si dit slot hadden gewonnen, stieten si dat vier daerin, ende brakent of ter aerden, sonder consent ende wille van hertoge Willem.
Auteursrechtelijk beschermd