Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den pays ende vrede tusschen die Hollanders ende die van Uutrecht.
Dat XIIII capitel.

Dese dinghen aldus ghesciet wesende doer middele ende tusschenspreken van enighe heren, is dair weder enen volcomen vasten pays ghemaect tusschen hertoghe Willem van Beyeren, grave van Hollandt, ende heere Jan van Arckel, bisscop van Uutrecht, in deser manieren: als dat si elck trecken souden in

[p. 219v]

haer eyghen landen, waeruut dat dye van Emenesse weder gecomen sijn ter obediencien van haren biscop. Voert, so worde geseit ende geconsenteert heren Ghijsbrecht van Vianen sine slot ende huys te Ghoreel weder op te mogen doen maken mit hulp ende bystant der stat van Uutrecht. Noch so worde geseit, dat alle die gevangen an beyden siden souden vry ende quijt zijn; ende bisonder die VII Gonterlingen die uuter stat van Uutrecht ghebannen waren souden vry wedercomen in der sat, als here Henric van den Rijn, proest van Sint Jans tUytrecht; here Pelgrom, zijn broeder; Jan van Woerden; Ghijsbrecht Gunter van den Hogen Lande, mit meer ander. Ende aldus soe bleef here Jan van Arkel biscop van Uutrecht dairna II jaer sonder oerloge, ende leefde mit vreden. Ende in datselve jaer quamen alle die gebannen Gunterlingen weder in des biscops genade, ende quamen weder in der stat, elc op die sine, als Gerrit Bole ende Dirc Bole, gebroeders; Jan Witte Roelofszoen; Pieter Kannemaker. Diewelke int belegge des slots van Ghoreel here Ghijsbrecht van Vianen te hulpe quamen mit IIII M ponden.