Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den strijt die geschiede tusschen den Hollanders ende die van Amersfoert bi Zoest.
Dat XII capitel.

In datselfde jaer, opten XIIII dach van maert, heeft here Ghijsbrecht van Nyenrode, ridder, die een vroem strijtber man was, mit vele gewapende uut Hollant, ridderen ende sciltknechten, ende mit vele vrome wapentuers, uut beveel hertogen Willems uut die graefscap van Hollant vergadert, ende is ghecomen binnen Naerden. Ende zijn heer aldaer in ordinancie geset hebbende, is hij mit al sijn heere uutgereyst, ende in wrake der stede van Wesop ende Muden heeft hi dat dorp van Zoest verbrant ende gepilgeert. Daertegen is ghecomen Otte van Laer, op dye tijt des bisscops maerscalc, ende is getogen mit die van Amersfoert in Emelant, opdat hij eenen strijt soude vechten tegen heere Ghijsbrecht van Nyenroede ende den Hollanderen. Ende als si tesamen in enen strijt vergadert waren, worde here Ghijsbrecht seer ghequetst ende gewont totter doot ende uuten strijde ghebrocht. Die van Amersfoert begonnen te met uuten stride te wiken, ende togen terugge, ende here Otte, die maerscalc, worde dair geslegen mit XXXVI poorters van Amersfoert. Ende die Hollanders behilden dat velt ende hadden victorie. Die Hollanders namen heren Ghijsbrecht op haer pieken, die volna doot was, ende liepen snellicken mit hem, ende berchden hem. Ende als si doer weyden ende broeken⁴³⁵ ende andere onwegen die vlucht genomen hadden, soe quam dye biscop mit een versch heer van poorters⁴³⁶ te paerde ende te voet, om dye sinen te hulp te comen. Ende als hi hoerde dat si doer onwegen dye vlucht hadden genomen, is hi ter siden uutgereden om hemluyden te bevechten, mer hi quam te laet. Ende reet droeflijcken wederom binnen Uutrecht, ende die Hollanders quamen blidelicken weder binnen Naerden.

435 aldus C; kroeken AB.

436 ontbr. AB.