Hoe dat die biscop Wesep ende Muyden wan.
Dat X capitel.
Daerna, int jaer M CCC ende LVI, na Sinte Pouwels dach Bekeringe, here Jan van Arkel, biscop van Uutrecht, seer swaerlic nemende dat grote ongelijc ende injurye, hinder ende scade die hem in sine landen van den Hollanders was gedaen, heeft hem toegestelt om dat te wreken, ende heeft vele soudeniers ende alle die macht sijns ridderscaps ende ondersaten tesamen vergadert, mitten welcken hi crachtelicken beseten ende belegen heeft die stede van Wesop ende dat huys te Muden. Ende als hij sonder aflaten dye stede ende poorteren met schieten ende mit assaulte, mit slingeren ende stormen sere hadde gemolesteert ende ghequelt, ende hadde een groot deel der muren ter neder ofgeworpen, opten IIII dach als hi daervoer quam, heeft hi die stede ende dat huys mit vechtenderhant ghewonnen ende an brande gesteken ende verbrant. Die poorters vielen in die graften ende swommen over die vesten, ende namen also dye vlucht. Ende die knechten ende soudenyers vercregen daer enen groten swaren roof van goet, ende namen vele gevangen mit hem. Dit geschiet wesende reysde die biscop weder tot sinen lande.
Auteursrechtelijk beschermd