Van den oerloge tusschen den biscop van Uutrecht ende Harman van Meervelt, ende van den voerspoedicheden des biscops.
Dat VIII capitel.
Een hoeftman, geheten Harman van Meervelt, ontseide in datselve jaer here Jan van Arckel biscop van Uutrecht, mit dat gehele Sticht, ende is gecomen int lant van Overysel mit veel gewapents volcxs; ende verwoeste dat met roven, mit branden, mit hem nemende vele gevangen ende enen groten roef. Die bisscop, dye desen overdaet wreken wilde, heeft terstont vergadert een uutgelesen hoop volcxs van sijn selfs dienres ende andere, ende is ghereden mit II M paerden int bisdom van Munster, ende heeft verdestrueert ende verwoest sijn watertochten, molens ende bruggen, ende sijn dorpen an brande gesteken, ende heeft enen groten rijcken roof weder vandaen ghebrocht. Ende ten lesten worter een vrede ende pays gemaect tusschen hen beyden. Omtrent dese selver tijt heeft biscop Jan van Uutrecht vergadert enen groten hoop wapentuers, ende is gereden om te bedwinghen die rebelheit van die van Yselham; want si ongehoersaem sijnde sijnre geboden, hem verbonden hadden mitten Vriesen; ende heeft se mede met groter cracht gebrocht onder sine heerlicheyt, ende mosten hem loven mit ede ende mit besegelde brieven, dat si hem voertan ende sine nacomelingen onderdanich ende subject wesen souden. Dese biscop Johan is dan voertghegaen als een glorioes prins, ende is seer victorioes ende voerspoedich geworden, betalende die sculden sijnre kercken, ende lossende alle die goeden, steden, sloten, landen ende al datter verset was, van hem, oft van sine voersaten, ende brocht die weder tot den eygendomme sijnre kercken, daer si van rechts wegen behoerden te wesen. Hi bedwanc vromelicken die anvechtinge der roevers ende der heren, ende wan ende destrueerde veel van haer sloten ende werp se ter neder; ende sommige, die grote beterscap beloefden, nam hi in genaden. Dye vervallen kercken dede hi repareren ende vermaken, ende dede se versien mit scone, costelike boeken ende ornamenten, mit kelcken ende anders, des hem van node was. In dye hoeftkercke van Uutrecht, als in den Dom, lyet hij maken op sijn eyghen kosten uut sine propere eygelicke goeden een uutermaten costelijcke myter, mit eenen silveren ende vergulden stave, daer men enen biscop van Uutrecht
Auteursrechtelijk beschermd