Hoe dat die biscop wedercreech tslot tot Eembrugge, Vredelant ende dat landt van Overysel.
Dat VI capitel.
Int jaer Ons Heren M CCC ende LIIII ontseide biscop Jan van Arckel here Sweer Uuterloe om die burch ende slot te Eembrugge, mer die stat van Uutrecht ende Montfoert maecten enen pays tusschen beyden partyen op sulcke condicien, als dat heer Sweer dat slot van den biscop te leen ontfangen soude. Ende voert en soude hi daer ghene castelein op mogen setten, dan enen burger van Uutrecht, opdat den Sticht van Uutrecht genen molestacye ende scade daeruut en soude gheschien. Ende die biscop creech oeck an hem dat casteel te Vredelant, datwelcke noch was onder dye heerlicheit der keiserinnen, graefinne van Henegouwen, ende loste dat, ende gaf dairvoir VII M ponden, dat welke here Jan van Diest, biscop van Uutrecht verset ende tonderpande gegeven hadde den goeden grave Willem van Henegouwen ende van Hollant, wiens dochter dese Margriet die keyserinne was, welcke somme ontfing here Floris van der Bochorst, ridder ende rentemeester der voerseyder keyserinne.
In datselve jaer quamen overeen ende dadingden mitten biscop heer Sweer van Voerst ende heer Vrederic van der Eze, van haren onmateliken eysche ende rekeninge der groter sommen van penningen als voer ghescreven staet, ende dair si dat gehele lant van Overysel te onderpanden hadden; ende si ontfingen van den biscop enen bequamen ende hoesschen somme van penningen. Ende alsdoe loste die biscop dat lant van Overysel an hem, want hi dat dair te voren eens hadde gelost van den hertoech van Gelre voer LX M goude Gelresse Ridders van goeder munten ende ghewichten.
Auteursrechtelijk beschermd