Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dye sloten ende castelen van Montfoert, Marckenburch, Holenstein ende Ghoreel angevochten ende gewonnen worden.
Dat V capitel.

Here Jan, biscop van Uutrecht, dye hem vromelic sette tegen sine vianden om dye bescermenisse zijnre kercken, heeft int jaer Ons Heren M CCC ende LIII, vergadert vele vrome ende stoute wapentuers, ende is op Sinte Pancraes dach getogen voer die stede ende tslot te Montfoerde, mit hem brengende een groot uutermaten swaer instrument, om daermede here Sweer, burchgrave van Montfoert, an te vechten ende zijn stede ende slot te bestormen, omdat hi daer te voren mitten here van Culenburch ende mitten here van Vianen tegen hem hadde gerebelleert. Die biscop heeft sijn belegge daervoer ghemaect, ende was seer sorchvoudich ende naerstich mit dat instrument die stede ende dat slot te destrueren ende te vernyelen. Die burchgrave anmerkende die grootmoedicheyt ende volstandicheyt des biscops in den belegge, heeft vrede ende genade begeert, ende heeft enen vrientlicken pays ende dadinge mitten biscop gemaect. Ende hi moste den biscop geven enen grote somme van penningen, soude hi hem nemen in genaden; ende hi moste den biscop enen eet doen, dat hi hem ende den bisdom voertan hout ende trou

[p. 215v]

wesen soude. Ende hiervan worden gemaect vaste ende goede besegelde brieven. Ende die biscop vercregen hebbende sinen wille ende victorie, is hi mit groter eren ende triumphen weder getogen in zijn stat.

In datselve jaer, alsoet een grote heete somer was, is die bisscop getogen uuter stat op des Heiligen Sacramentsdach, mit een groot swaer volc van wapenen, te paerde uut Uutrecht ende Amersfoert, ende heeft dat slot te Marckenburch belegen. Ende lach daervoer IX weken lang, dat bestormende ende anvechtende mit magenen ende andere diverse instrumenten, ende heeftet ten lesten stormenderhant gewonnen, ende nam alle die borchsaten gevangen, ende lieter een deel onthoefden, ende verwoeste dat casteel, ende bracket of ten gronde toe. Ende in datselve jaer, in den herst, heeft die biscop gesonden sinen mairscalc mit uutgelesen wapentuers uuter stat van Uutrecht, om te becrachtigen ende te winnen dat slot te Holenstein. Mer die borchsaten gaven hem op in des biscops handen, behouden hair lijf ende goet. Ende die biscop dede dat slot slechten ende nederwerpen totter aerden, omdattet een starcke burch was der roevers, ende dye borchsaten plagen daeruut te riden ende deden den Stichte van Uutrecht vele scaden van roeven ende branden. In dat jaer daerna heeft die biscop weder toegemaect ende vergadert een groot deel burgeren, ende is mit heercracht getogen ende beleyde dat casteel van Ghoreel; ende als hi dat mit cracht gewonnen hadde, liet hi dat ofbreken ende slechten totter aerden. Dairna, als die biscop lach voir dat huys te Nyevelt, doe worde die soen ende pays gemaect, ende daer wert gesloten ende uutgesproken ende oec toegelaten dat here Ghijsbrecht van Vianen mit hulpe des stats van Uutrecht op dieselve plaetse dat huys ende slot Ghoreel weder optimmeren ende maken soude, datwelcke hi volbrochte.