Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe die sloten Woudenburch⁴²⁹ ende Ruweel destrueert worden ende van die rebelheyt des heren van Culenburch ende van Vianen.
Dat IIII capitel.

Int jaer Ons Heren M CCC ende LII, doen cofte here Ghijsbrecht van Abcoude ende Wijc van here Jan van Woudenburch, dat slot ende casteel te Woudenburch. Dese here Jan van Woudenburch, ridder, hadde enen soen, cloeck ende vroem, die overmits raets ende hulps heren Jans van Culenburch sijns neefs, ghecomen is mit een deel stoute wapentuers in der duyster nacht, ende beclam dat slot te Woudenburch, tegen wille ende consente sijns vaders; ende en woude niet toelaten die coop die daer was ghesciet. Waerom dat here Ghijsbrecht van Abcoude ende here Jan van Woudenburch sijn getogen totten bisscop, hem te kennen gevende ende claghende dat grote gewelt van desen jongen voerseyt. Die biscop heeft van stonden an dit slot van Woudenburch alomme belegen XVII weken lanck, datwelcke hi dicwils mit magnelen ende andere instrumenten so crachtelicken dede anvechten, dat hi dat mit werender ende stormender hant ghewonnen heeft opten eersten dach van der Vasten des tsjaers dair an. Ende alle die hi daer op vant, nam hi ghevangen. Ende si mosten hem copen mit groot, swaer scatghelt ende goet, ende dat slot van Woudenburch dede hi ter aerden toe nederwerpen ende slechten. Daerentusschen dat die biscop lach int belegge voer Woudenburch, soe bevacht ende bestormde die maerscalc van Uutrecht dat huys ende slot te Ruweel, omdat die borchsaten dicwils ofquamen van den huyse, ende bescadichden die dorpen ende luyden van den bisdom. Ende als hij daer een wijl tijts voer hadde gelegen wan hi dat mit crachte, ende brochtet onder dye subjectie van den biscop. Ende III jaer daerna cofte Wouter van Minden van den biscop datselve huys.

Op dieselve tijt als die biscop noch voer Woudenburch lach, so ontseiden den biscop here Jan van Culenburch ende here Ghijsbrecht van Vianen, ridderen, ende togen in dat Sticht, roevende ende brandende die dorpen ende lanthuysen, ende anvochten des biscops landt uut haer castelen als Culenburch, Vianen, Ghoreel ende Marckenburch⁴³⁰.

429 Wondenburch AB.

430 Marckenbnrch AB.