Hoe die biscop van Uutrecht wan die stede van Oudewater, ende van den strijt voer Scoenhoven.
Dat IX capitel.
Int selve jaer van XLIX, na Onser Liever Vrouwen Bootscapsdach, heeft dye biscop van Uutrecht vergadert uut sine stat van Uutrecht ende uut andere steden ende plaetsen sijns bisdoms een groten hoop volcs van wapenen, ende is mit heercracht gecomen in Hollant. Ende beleide die stede van Oudewater, ende hi wan de stede mit crachte, ende verbarnde se tmeeste deel, ende creech daer veel gevangen, ende nam een groten roof met hem. Nochtans bleven daer doot Jan van Risenburch; twe broeders van Lichtenburch; Jacop van Driel; Jan van Driel; Evert van Driel, mit veel burgheren ende vrome schiltknechten. Die Hollanders dit vernemende ende dat qualic verdragen mochten, dat die stede van Oudewater aldus gewonnen ende verdestrueert was, vergaderden alle die ridderscap, ende staken tesamen uut allen steden ende dorpen, een grote menychte van gewapende mannen; ende waren in die meninge wederom trecken int Sticht van Uutrecht of een strijt mitten biscop te vechten. Waerom die biscop heeft vergadert alle sijn volc uuter stat ende uuten bisdom, ende is mit heercracht gecomen bi Scoenhoven. Die Hollanders ende dye van Scoenhoven sijn mit blinckende bannieren stoutelicken den biscop ende sijn heer tegemote gegaen, daer langhe omme die overhant ghestreden worde; mer int leste worden die Hollanders verwonnen, ende die biscop mit sijn volc behylt dat velt ende hadde victorije. Ende daer worden gevangen Ghijsbrecht van Langheraeck; Herper van Liesvelt; Coenraet van Oesterwijc, ridderen, ende veel meer andere sciltknechten ende wapentuers, denwelken die biscop een groten zomme van penningen ofscatte. Daerna, omtrent Sinte Bertelmees, is daer by tuschenspreken van sommige heren een bestant gemaect tusschen den twe pertien, durende tot Sinte Martijnsdach tot int jaer van M III C ende vijftich.
Auteursrechtelijk beschermd